Qazaqstan 2025 jyly 78,7 mln tonna munaı eksporttaǵan

ASTANA. KAZINFORM — 2025 jyly Qazaqstan munaı eksporttaý josparyn 11,6% artyq oryndaǵan. Bul týraly Energetıka mınıstri Erlan Aqkenjenov vedomstvonyń keńeıtilgen alqa májilisinde baıandady.

— Qazaqstanda munaıdy eksportqa jáne ishki naryqqa jetkizýdiń ártaraptandyrylǵan tasymaldaý júıesi bar. Aldymen ishki naryq qajettiligi qamtamasyz etiledi. Óndirilgen munaıdyń shamamen 80%-y eksportqa baǵyttalady. 2025 jyly munaı eksporty 78,7 mln tonna bolyp, josparmen salystyrǵanda 11,6%-ǵa artty. Bul Teńiz ken ornyndaǵy keńeıtý jobalarynyń iske qosylýyna baılanysty, — dedi mınıstr. 

Vedomstvo basshysy eksporttyń negizgi ósimi KTK baǵyty boıynsha (64,8 mln tonna) tasymaldanǵanyn atap ótti.

— Bul 2024 jylmen salystyrǵanda 18%-ǵa joǵary. Baký–Tbılısı–Djeıhan baǵyty arqyly jylyna 1,2 mln tonna qazaqstandyq munaı tasymaldanyp jatyr. Ázerbaıjan tarapy kólemdi 2,2 mln tonnaǵa deıin arttyrýǵa daıyn ekenin bildirdi, — dedi ol.

Buǵan deıin, mınıstr Erlan Aqkenjenov Qarashyǵanaq gaz óńdeý zaýytynyń jobalyq qujattaryn ázirleý bastalǵanyn málim etken bolatyn.