Oraza aıt merekesinde Qazaqstanǵa saıahattaǵysy keletinderdiń arasynda BAÁ týrısteri kóbirek nıet tanytqan
ASTANA. KAZINFORM – Qasıetti Ramazan aıy kelip, Oraza aıt jaqyndaǵan saıyn Skyscanner ǵalamdyq áýe saıahaty boıynsha izdeý júıesiniń derekteri BAÁ turǵyndary úshin Qazaqstannyń eń tanymal saıahat baǵytyna aınalǵanyn kórsetti. Bul týraly «Kazakh Tourism» UK» AQ Baspasóz qyzmeti málim etti.
«Skyscanner málimeti boıynsha, BAÁ turǵyndary eń qolaıly ushý kúni retinde 2024 jyldyń 2 sáýirin tańdaǵan. Saýalnamaǵa qatysqan saıahatshylardyń jartysynan kóbi (51%) bir aptaǵa nemese odan az ýaqytqa saparlardy brondaýdy qalaıdy. Qazaqstanǵa degen qyzyǵýshylyqtyń 195%-ǵa ósýi basqa tanymal baǵyttarǵa qaraǵanda aıtarlyqtaı joǵary kórsetkish» — delingen habarlamada.
Demalys úshin tańdalǵan elderdiń tolyq tizimi kelesideı kórsetilip, sáýir aıyndaǵy reısterdi izdeýdiń jyl saıyn artqany baıqalady.
• Qazaqstan: 195%
• Seıshel araldary: 115%
• Kıpr: 99%
• Japonııa: 90%
• Vetnam: 81%
• Oman: 78%
• Shveıtsarııa: 56%
• Kenııa: 53%
• Mavrıkıı: 52%
• Grekııa: 49%
Skyscanner saıahat sarapshysy Aııýb El Mamýn BAÁ turǵyndarynyń Qazaqstandy tańdaýy Oraza aıt meıramynda mádenı jáne baıypty saıahatqa degen umtylyspen baılanysty ekenin jáne de bul Qazaqstandaǵy týrızmniń tıimdi damyp otyrǵanyn kórsetetinin atap ótti.
«Kazakh Tourism» UK» AQ eQonaq júıesiniń derekteri BAÁ týrısteriniń Qazaqstanǵa degen qyzyǵýshylyǵynyń artyp kele jatqanyn rastaıdy, bul kelýshiler sanynyń 2022 jyly 2963 týrıstten 2023 jyly 6051 týrıstke deıin eki esege artqanyn kórsetedi. BAÁ týrısteriniń Qazaqstandaǵy negizgi baǵyttarynyń ishinde Almaty, Astana qalalary jáne Almaty oblysy erekshe kózge túsedi» - dep habarlady «Kazakh Tourism» UK» AQ Baspasóz qyzmeti.
Birikken Arab Ámirlikteri turǵyndary úshin týrıstik baǵyt retinde Qazaqstan tanymaldylyǵynyń artýy tabıǵı sulýlyq, mádenı baılyqtyń biregeı úılesimi men eldiń halyqaralyq týrızmdegi eleýli áleýetin kórsetedi. Óıtkeni, elimizdiń tabıǵaty men mádenı qory jyl ótken saıyn sheteldik týrıster arasynda buryn-sońdy bolmaǵan qyzyǵýshylyq týdyryp keledi. Ásem taýlar, kólder men ózenderdiń tańǵajaıyp peızajdary, rýhanı týrıstik oryndar men dala halqynyń shynaıy jáne zamanaýı dástúrleriniń tandemi tanymaldyqtyń artýyna qozǵaýshy kúshke aınalyp otyr.
