Qazaqstan 2024 jylǵy Ǵalamdyq kıberqaýipsizdik ındeksinde óz pozıtsııasyn nyǵaıtty

ASTANA. KAZINFORM – 12 qyrkúıekte BUU Halyqaralyq elektr baılanysy odaǵy (ITU) «2024 jylǵy Ǵalamdyq kıberqaýipsizdik ındeksi» (GCI) týraly baıandamasyn jarııalady. Jańa ádisnamaǵa sáıkes, Qazaqstan 100 múmkin baldan 94,04 ball jınap, ekinshi topqa (Tier 2 – Іlgerileý) endi.

Tsıfrlyq damý, ınnovatsııalar jáne aeroǵarysh ónerkásibi mınıstrligi málimetinshe, GCI reıtıngi kıberqaýipsizdiktiń bes negizgi baǵytyn qamtıtyn 83 parametrge negizdelip qalyptastyrylady: zańnamalyq, tehnıkalyq, uıymdastyrýshylyq aspektiler, áleýetti damytý jáne halyqaralyq yntymaqtastyq. 2024 jylǵy esepte elderdiń kıberqaýipsizdik salasyndaǵy jetistikterin dálirek baǵalaýǵa múmkindik beretin jańartylǵan bes deńgeıli taldaý qoldanylady. Deńgeılerge Tier 1 – Úlgi kórsetý, Tier 2 – Іlgerileý, Tier 3 – Qalyptasý, Tier 4 – Damyp keledi jáne Tier 5 – Qalyptasý satylary kiredi.

Qazaqstan Tier 2 – Іlgerileý tobyna Qytaı, Avstrııa, Kanada jáne Ázerbaıjan sııaqty eldermen qatar kirdi. Baǵalaýǵa álemniń 194 eli qatysty. Aldyńǵy esepte (2020/2021 jj.) eski ádisteme qoldanylǵan kezde, Qazaqstan 31-orynda turǵan edi.

Jańa ádistemege sáıkes, elimiz «zańnamalyq» jáne «yntymaqtastyq» baǵyttary boıynsha barlyq talapty oryndap, jetkilikti tehnıkalyq deńgeıin kórsetti. Alaıda reıtıngti odan ári kóterý úshin uıymdastyrýshylyq sharalardy kúsheıtý, áleýetti damytý jáne kıberqaýipsizdik salasyndaǵy halyqaralyq yntymaqtastyqty arttyrý qajet.

Jańa ádisteme 2023 jyldaǵy jumysty baǵalaıdy jáne ındeks eki jylda bir ret jańartylyp otyrady.

Óz kezeginde, TsDIAÓM-niń Aqparattyq qaýipsizdik komıteti qazaqstandyq kompanııalarmen birlesip, Qazaqstannyń halyqaralyq arenadaǵy pozıtsııasyn jaqsartý baǵytynda turaqty túrde jumys istep keledi.