Qazaqstan 2020 jyly 1,3 mlrd dollardyń aýyl sharýashylyǵy ónimderin eksportqa shyǵardy
«Jalpy, ótken jyl jaqsy nátıjelermen aıaqtaldy. 20,1 mln tonna dándi jáne dándi-burshaqty daqyldar bastyryldy. Lıtsenzııalanǵan astyq qabyldaý kásiporyndaryna tapsyrylǵan jalpy bıdaı kóleminiń 80 paıyzy 1-3-synyptarǵa jatqyzyldy. 2019 jyly bul kórsetkish 50 paıyzdy quraǵan bolatyn. Tıisinshe, 4-synypty bıdaıdyń úlesi 2019 jylǵy 27,7 paıyzdan 13,4 paıyzǵa, al 5-synypty bıdaıdyń úlesi 10,7 paıyzdan 5 paıyzǵa tómendedi», - dedi mınıstr.
Onyń atap ótýinshe, 2020 jyldyń qorytyndysy boıynsha iri qara mal 7,8 mln basty qurady. Bul 2019 jyldyń deńgeıinen 5,6 paıyzǵa kóp. Qoı men eshki basy 4,7, jylqy 10,1, túıe 5,2 paıyzǵa artty. Tıisinshe mal sharýashylyǵy ónimderi – et 4,3, sút 3,2 paıyzǵa ulǵaıýda.
«Nátıjesinde jalpy aýyl sharýashylyǵy óniminiń kólemi 2020 jyly 5,7 paıyzǵa artyp, 6,3 trln teńgeni qurady. Bul - Eýrazııalyq ekonomıkalyq odaq elderi arasyndaǵy eń úlken ósim. Tamaq ónimderiniń óndirisi 4 paıyzǵa ósti. Aýyl sharýashylyǵynyń negizgi kapıtalyna tartylǵan ınvestıtsııalar aǵyny 15, tamaq ónimderi óndirisine tartylǵan ınvestıtsııalar aǵyny 13,5 paıyzǵa artty. Qorytyndysynda agroónerkásip keshenindegi ınvestıtsııalardyń jalpy kólemi 677,2 mlrd teńgeni qurady. Bul josparly mánnen 154,2 mlrd teńgege asyp otyr», - dedi Saparhan Omarov.
Mınıstrdiń dereginshe, óńdelgen aýyl sharýashylyǵy ónimderiniń eksporty 22 paıyzǵa artyp, 1,3 mlrd AQSh dollaryn qurady.
«Agroónerkásip keshenin odan ári ornyqty damytý maqsatynda mınıstrlik Agroónerkásip keshenin damytý jónindegi 2021-2030 jyldarǵa arnalǵan tujyrymdamany jáne Agroónerkásip keshenin damytýdyń 2021-2025 jyldarǵa arnalǵan ulttyq jobasyn ázirledi. Memleket basshysynyń tapsyrmalaryna sáıkes olardyń negizgi maqsattary: birinshi, eńbek ónimdiligin 2,5 esege arttyrý; ekinshi, ishki naryqty azyq-túlik taýarlarymen 80 paıyz deńgeıinde molyqtyrý; úshinshi, óńdelgen ónim eksportyn 2 esege ulǵaıtý; tórtinshi, iri ınvestıtsııalyq jobalar aınalasynda 7 ekojúıe qalyptastyrý. Jalpy, josparlanǵan is-sharalar aldaǵy bes jylda eńbek ónimdiligin 2,5 esege arttyrýǵa, óńdelgen ónim eksportyn 2 esege ulǵaıtýǵa, sondaı-aq salaǵa 4,5 trln teńge ınvestıtsııa tartýǵa múmkindik beredi. Bul qosymsha 500 myń adamdy jumyspen qamtamasyz etip, 1 mln adamnyń tabysyn arttyrady», - dedi ol.