Qazaqstan 2020 jylǵa deıin batystyq óndiristen shyqqan 61 áýe kemesi satyp alady
ASTANA. QazAqparat - Qazaqstan 2020 jylǵa deıin batystyq óndiristen shyqqan 61 áýe kemesin satyp almaq. Bul týraly búgin QR Prezıdenti janyndaǵy OKQ-de ótken brıfıngte QR Investıtsııalar jáne damý mınıstrliginiń birinshi vıtse-mınıstri Jeńis Qasymbek aıtty.
«Qazaqstanda 2020 jylǵa deıin batystyq óndiristen shyqqan 61 áýe kemesin satyp alýdy josparlap otyr. Olardyń shyǵarylǵan merzimderi de ártúrli bolady. «Eır Astana» 6 jyldan aspaıtyndaryn alsa, «Skat» kompanııasy 15 jyl qoldanysta bolǵan ushaqtardy satyp alady. Bul qazaqstandyq kompanııalardyń áýe keńistigindegi baǵyttary ulǵaıyp, jańa reıster ashýǵa jol ashady. Baǵdarlama boıynsha, 2020 jylǵa deıin 75 halyqaralyq áýe qatynasyn ashý josparlanǵan. Osylaısha, olardyń jalpy sany 128-ge jetedi», - dep atap ótti J. Qasymbek.
Sonymen qatar, birinshi vıtse-mınıstrdiń aıtýynsha, bıyl jyl basynan beri Qazaqstannyń áýe keńistigi 8 ushaqpen tolyqty. Olardyń 5-eýi «Eır Astanaǵa», 2-eýi «Bek Eır» kompanııasyna, al bireýi «Skatqa» tıesili. Sondaı-aq, QR IDM 2020 jylǵa qaraı Qostanaı, Óskemen, Semeı jáne Petropavl qalalarynyń áýejaılaryndaǵy ushý-qoný jolaqtaryn tolyǵymen jóndeýden ótkizedi.
