Qazaqstan 2020 jylǵa deıin agroónerkásip keshenin damytýǵa shamamen 3 trln. teńge jumsaıdy

ASTANA. 21 qarasha. QazAqparat - Qazaqstan 2020 jylǵa deıin agroónerkásip keshenin damytýǵa shamamen 3 trln. teńge jumsaıdy. Bul týraly búgin «Nur Otan» HDP-de Qazaqstan Respýblıkasynda agroónerkásip keshenin damytý boıynsha 2013-2020 jyldarǵa arnalǵan baǵdarlamanyń jobasyn talqylaýǵa arnalǵan jıynda QR Aýyl sharýashylyǵy mınıstri Asyljan Mamytbekov aıtty.

«2020 jylǵa deıin agroónerkásip keshenin damytýǵa jalpy somasy 2 trln. 977 mln. teńge bólinedi. Onyń 14 paıyzy AÓK-lerdi memlekettik qamtamasyz etýge jáne 14 paıyzy salany qarjylaı saýyqtyrýǵa bólinedi», - dedi A.Mamytbekov jıyn barysynda.

Onyń aıtýynsha, baǵdarlama aıasyndaǵy jumystar 4 baǵyt boıynsha júrgiziledi. Olar: qarjylaı saýyqtyrý, taýarlar, qyzmetter men jumystardyń AÓK sýbektilerine qol jetimdiligi, AÓK sýbektilerin qamtamasyz etýdiń memlekettik júıesin arttyrý, memlekettik retteý júıesiniń tıimdiligin arttyrý.

«Baǵdarlamanyń basym úlesin taýarlar, jumystar men qyzmetterdiń ekonomıkalyq qoljetimdiligin arttyrý, ıaǵnı naqtyraq aıtsaq sýbsıdııa usyný boıynsha is-sharalar quraıdy», - dedi A.Mamytbekov.