Qazaqstan 2019 jyly BUU Turaqty damý maqsattaryn iske asyrý jónindegi ulttyq sholýyn usynady

ASTANA. QazAqparat - Syrtqy ister mınıstriniń orynbasary Erjan Ashyqbaev BUU-daǵy Turaqty damý jónindegi joǵary deńgeıdegi saıası forýmdaǵy bir ýaqytta Turaqty damý maqsattaryn ımplementatsııalaý arqyly Ortalyq Azııadaǵy yntymaqtastyqty nyǵaıtý jónindegi is-sharaǵa qatysyp, Qazaqstannyń múddesin bildirdi, dep habarlaıdy syrtqy saıasat vedomostvosynyń baspasóz qyzmeti.

 

Óz sózinde E. Ashyqbaev Qazaqstannyń Turaqty damý maqsattaryn iske asyrý protsesine ulttyq, sondaı-aq halyqaralyq deńgeıde berilgendigi týraly aıtyp, qaýipsizdik pen turaqty damý máseleleri arasyndaǵy ózara baılanystyń mańyzdylyǵyn atap ótti.

Qazaqstan 2019 jyly turaqty damý salasynda 17 maqsatty iske asyrý jónindegi birinshi erikti ulttyq baıandamamen sóz sóıleýge nıet bildirýde.

«Turaqty damý maqsattaryn iske asyrý isinde ulttyq deńgeıde qol jetkizilgen jetistikterdiń barlyǵyn saqtaý jáne ulttyq erikti sholýlardyń birinshi tsıkli aıaqtalǵannan keıin olardyń ımplementatsııasyn Ortalyq Azııa elderi arasyndaǵy tyǵyz óńirlik ózara is-qımyl jasaý arqyly jalǵastyrý mańyzdy», - dedi E. Ashyqbaev.

Syrtqy saıası vedomstvo basshysynyń orynbasary BUU Bas hatshysynyń saıası máseleler jónindegi orynbasary Rozmarı Dı Karlomen kezdesip, oǵan aǵymdaǵy jylǵy 5 qyrkúıekte Astanada ótetin Aýǵanstandaǵy áıelderdiń quqyqtar men múmkindikterin keńeıtý jónindegi halyqaralyq konferentsııaǵa shaqyrtýdy tabystady. Taraptar jahandyq kún tártibiniń ózekti máselelerin, Qazaqstannyń BUU Qaýipsizdik Keńesindegi jumysyn, sonyń ishinde Aýǵanstandaǵy jaǵdaıdy sheshý boıynsha qazaqstandyq taraptyń kúsh-jigerin, sondaı-aq tolyǵymen Ortalyq Azııadaǵy jaǵdaıdy talqylady.

BUU Bas hatshysynyń ekonomıkalyq jáne áleýmettik máseleler jónindegi orynbasary Lıý Chjenmınmen kezdesýde áńgimelesýdiń basty taqyryby, BUU qurylymdary qatysýymen Ortalyq Azııa elderindegi jáne Aýǵanstandaǵy aımaqtyq yntymaqtastyqtyń jańa serpinin berý boldy.

Ortalyq Azııa boıynsha saıd-ıventte BUU Bas hatshysynyń kómekshisi Djıhan Sýltanoglý, EO-nyń Ortalyq Azııa boıynsha arnaıy ókili Peter Býrıan, BUU Eýropa ekonomıkalyq komıssııasynyń atqarýshy hatshysy Olga Algaerova, sondaı-aq Ortalyq Azııa memleketteri men is-sharanyń birlesken oryndaýshysy retinde Slovakııanyń laýazymdy ókilderi qatysty.

«Bizdiń álemdi qaıta qurý: 2030 jylǵa deıingi kezeńge turaqty damý salasyndaǵy kún tártibi» dep resmı tanylǵan turaqty damý maqsattary - bolashaq halyqaralyq yntymaqtastyqqa arnalǵan maqsattardyń jıyntyǵy. Osy maqsattarǵa 2015 jyldan 2030 jylǵa deıin qol jetkizý josparlanýda. «Bizdiń álemdi qaıta qurý: 2030 jylǵa deıingi kezeńge turaqty damý salasyndaǵy kún tártibi» atty qorytyndy qujat 17 jahandyq maqsattan jáne 169 tıisti mindetten quralǵan.