Qazaqstan 2018 jyly Aı-92 benzınimen ózin tolyq qamtamasyz ete alady
ASTANA. QazAqparat - Qazaqstan Aı-92 benzınimen 2018 jyly ózin-ózi tolyq qamtamasyz ete alady. Bul týraly QR Energetıka mınıstri Qanat Bozymbaev málim etti.
Qanat Bozymbaev mınıstrliktiń keńeıtilgen alqa otyrysynda elimizdegi munaı óńdeý zaýyttarynyń úsheýi de jańǵyrtylýdan jaqyn jyldary ótip bitetindigine toqtaldy. Zaýyttar tolyq jobalyq qýattylyǵyna ótkennen soń, ishki naryq alǵash ret otandyq janar-jaǵarmaımen tolyqtaı qamtamasyz etiledi. Benzın, dızel, áýekerosın ımporttaý toqtatylady.
«Onyń ústine janar-jaǵarmaı ónimderin syrt elderge eksporttaýdy bastaımyz, sebebi Aı-92 benzınine degen muqtajdyq múldem bolmaıdy. Osylaısha, 2018 jyly biz ózimizdi-ózimiz tolyqtaı munaı ónimderimen qamtamasyz ete alamyz. Bul bizdiń tarıhymyzda alǵash ret oryn alaıyn dep jatyr», - dedi mınıstr.
Onyń sózinshe, jańartylǵan zaýyttar 14,5 mln tonnadan 17,5 mln tonnaǵa deıin munaı óńdeı alatyn bolady. Benzın, dızel, áýekerosınin shyǵarý ulǵaıyp, mazýt óndirisi azaıtylady.
«2017 jyly biz 3 mln tonna benzın, 4 mln tonna dızel otynyn, 3 mln tonna mazýt, 300 myń tonna áýekerosınin shyǵarýdy josparlap otyrmyz», - dedi ol.
Eske sala keteıik, Qazaqstan qazirgi ýaqytta joǵary oktandy benzınniń 30 paıyzyn jáne dızeldiń 15 paıyzyn Reseıden ımporttaýǵa májbúr.
