Qazaqstan 2017 jyly Qytaıǵa 50 myń tonna sıyr etin eksporttaýdy kózdep otyr
ASTANA. QazAqparat - Qazaqstan 2017 jyly Qytaıǵa 50 myń tonna sıyr etin eksporttaýdy kózdep otyr. Bul týraly búgin KazMeatAstana-2016 atty halyqaralyq forýmda Qazaqstannyń et óndirýshileri odaǵynyń basshysy Maqsut Baqtybaev málim etti.
«Biz kelesi jyly Qytaıǵa 50 myń tonna sıyr etin eksporttaýdy josparlap otyrmyz. Etti shekara ashylǵanda jónelte bastaımyz. Úkimet basshysy deńgeıinde bul másele sheshimin tapty, qazirgi ýaqytta bizdiń kásiporyndardyń veterınarlyq sertıfıkattary men tehnıkalyq aýdıtteri boıynsha jumys jasalyp jatyr. Bul baǵyttaǵy jumystar keminde 4-5 aıǵa sozylady», - deıdi ol.
Onyń sózine qaraǵanda, qazaqstandyq óndirýshilerdiń qazirdiń ózinde osyndaı kólemdegi etti eksporttaýǵa kúshi jetedi.
Sonymen qatar «QazAgro» holdıngi basqarma tóraǵasynyń orynbasary Aıdarbek Qojanasarovtyń aıtýynsha, Qytaı naryǵy Qazaqstannyń et óndirýshileri úshin áleýetti naryq bolyp otyr. Sebebi qazirgi ýaqytta Qytaıda tutyný mádenıeti kúnnen kúnge et pen un ónimderine oıysyp barady.
Holdıng ókiliniń atap ótkenindeı, qytaılyq azamattar óz elindegi ekologııalyq máselelerge baılanysty Qytaıda shyǵarylǵan azyq-túlikterden góri, kóbine-kóp organıkalyq taza shetel taǵamdaryn tańdaıdy.
«Byltyr Qytaı 300 myń tonna sıyr etin ımporttady. Al 2010 jyly onyń kólemi 23 myń tonna ǵana bolatyn. Demek, on jylda ımport 10 ese ulǵaıǵan», - dedi ol.
