Qazaqstan 2017 jyly halqy kári memleketter tizimine qosylmaq
ASTANA. 19 qarasha. QazAqparat - Qazaqstan 2017 jyly halqy kári memleketter tizimine enedi dep bojanýda. Bul týraly búgin Astanada metabolızm máselelerine arnalǵan halyqaralyq konferentsııada QR Prezıdentiniń Іs basqarmasy medıtsınalyq ortalyǵynyń bastyǵy Valerıı Benberın málim etti.
«Qazaqstan halqy qartaıýdyń aldynda tur. BUU memleket halqynyń qartaıý úrdisin anyqtaýǵa múmkindik beretin halyq jasynyń kórsetkishterin bekitti. Ol boıynsha 65 jastan asqan halyq sany 4 paıyzdan kem bolsa, ony jas memleket dep ataıdy. Eger olardyń sany 4-7 paıyz aralyǵynda tirkelse, memleket qartaıýdyń aldynda tur degen sóz. Qart kisiler elde 7 paıyzdan joǵary bolǵan jaǵdaıda, ol kári memleket dep tanylmaq. Bul kórsetkish boıynsha, Germanııada 65 jastan joǵary halyqtyń úlesi - 24, Ulybrıtanııada - 20, Ýkraınada - 18, AQSh-ta - 16, Reseıde - 15 jáne Qazaqstanda - 6,6 paıyzdy quraıdy. 2017 jyly bizdiń elde bul kórsetkish 7 paıyzdan asady dep josparlanýda. 2020 jyly 65 jastan joǵary halyqtyń úlesi Qazaqstanda 7,4 paıyzǵa deıin jetedi», - dedi ol óz baıandamasynda.
Onyń aıtýynsha, semizdik, qant dıabeti, júrek qan-tamyr aýrýlary, asqazan-ishek joldary aýrýlarynyń sany halyqtyń arasynda jyldan jylǵa kóbeıip keledi. Sonyń kesirinen elde qartaıý úrdisi jyldam júrýde.
«Adam denesindegi zat almasý úrdisteriniń qarqyny tómendegen saıyn atereskleroz, gıpertonııalyq, júrek aýrýlarynyń, qant dıabetiniń, qaterli isiktiń jáne basqa da aýrýlardyń damý qaýpi arta túsedi. Degenmen tamaqtaný arqyly qartaıýdy tejeýge nemese tipti toqtata turýǵa bolatyny ǵylymı turǵydan dáleldenip otyr. Salaýatty ómir salty, ıaǵnı belsendi qımyl-qozǵalys pen durys tamaqtaný halyqtyń arasyndaǵy ólim-jitim sanyn edáýir tómendetýge yqpal etedi», - dep atap ótti V.Benberın.
