Qazaqstan 2017 jylǵa qaraı Halyqaralyq julyn maı bankiniń tolyq múshesi bolýy múmkin
ASTANA. QazAqparat - 15 aqpanda álemniń kóptegen elderinde obyr aýrýyna shaldyqqan Halyqaralyq balalar kúni atap ótiledi.
Sondyqtan, búgin Astana qalasyndaǵy «Ana men bala» ulttyq ǵylymı ortalyǵy qaterli isikke shaldyqqan balalardy, olardyń ata-analaryn, demeýshiler men dárigerlerdiń basyn qosyp, kún tártibindegi ózekti máselelerdi talqylady. Onda dárigerlerdiń 2015 jylǵy jumystary qorytyndylandy. Jalpy, ortalyqta 2010 jyly 30 tósek-orynǵa arnalǵan onkogematologııa bólimshesi ashylǵan bolatyn. Al, qazir, ıaǵnı, arada 5 jyl ótken soń ortalyqta 95 adamǵa arnalǵan eki balalar onkologııasy bólimshesi qyzmet etedi. Onyń ishinde kemik maıyn aýystyrýǵa arnalǵan 6 tósek-oryndyq taza keshen bar.
2013 jyly balalar arasyndaǵy kúrdeli isikterdi emdeýge arnalǵan ekinshi onkologııa bólimshesi ashyldy. Ortalyqta jylyna onkogematologııalyq aýrýlarmen 1 myńnan asa bala em alady. Jalpy osy jyldar ishinde ishinde ortalyqta onkogematologııalyq aýrýǵa shaldyqqan 1540-tan asa bala emdelip shyqqan.
Al, bıyl Qazaqstanda alǵash ret qannyń qaterli isigine shaldyqqan ul balaǵa anasy qyz balaǵa bosanyp jatqan kezde kindik qany sátti aýystyryldy.
Ortalyqtaǵy №1 onkologııa bóliminiń meńgerýshisi Daır Nurǵalıevtiń aıtýynsha, balanyń julyn maıyn aýystyratyn donor tabylmaǵan soń, ata-anasy osyndaı sheshim qabyldaǵan.
«Bizdiń ortalyqta ólim aýzynda jatqan ul balaǵa julyn maıy tabylmady. Qazaqstanda da, shet elde de, tipti, týystarynyń arasynda da donor tabylmaǵan soń, ata-anasy ekinshi ret balaly bolamyz dep sheshti. Meniń oıymsha, ata-analardyń kóbi osy amaldy oılanyp kórýi kerek. Onyń ústine, jańa týǵan balanyń julyn maıyna, qanyna tıispeımiz, biz anasyn osy ortalyqta bosandyryp, onyń kindikbaýynan qan alamyz. Ádette, bul óte qymbat turatyn protsedýra. Al, balasy obyr aýrýyna shaldyqqan ata-analar úshin biz bul protsedýrany tegin jasaımyz. Anasyn osy ortalyqta bosandyryp, kindik qanyn alyp, ony tazalap, aýyryp jatqan úlken balalaryna quıamyz. Mine, Qazaqstanda tuńǵysh ret jasalǵan osyndaı transplantatsııa sátti ótti. Qazir 7 jasar sol ul bala men eki jasar qaryndasy aman-esen ósip jatyr»,-deıdi D.Nurǵalıev.
Suhbat barysynda dáriger jaqsy jańalyq jetkizdi. Qazaqstan 2017 jylǵa qaraı Halyqaralyq julyn maı bankiniń tolyqqandy múshesi bolýy múmkin.
«Qazaqstannyń julyn maı bankinde qazir 2 myńnan asa donor tirkelgen. Reseıde 7 myńnan asa donor bar. Ózderińiz biletindeı, Halyqaralyq julyn maı banki bar. Bul banktiń múshesi bolý ońaı emes. Óte kóp uıymdastyrý jumystary men qyrýar qarjy kerek. Biraq, Qazaqstan birtindep osy bankke jaqyndap keledi. Mysaly, byltyr Qazaqstan bıomaterıaldardy shekaradan alyp ótýge bolatyn zańǵa qol qoıdy. Mine, bunyń ózi úlken bir qadam. Endi, qaıyrymdylyq qorlary men memleket atqaratyn jumystardyń arqasynda 2017 jylǵa qaraı osy halyqaralyq bankke múshe bolýymyz múmkin»,-deıdi dáriger.
