Qazaqstan 2016 jyly bokstan áıelder arasyndaǵy álem chempıonatyn ótkizedi

Bul qazaqstandyq bokstyń taǵy bir kezekti jeńisi. Bul týraly Qazaqstan boks federatsııasynyń baspasóz qyzmetinen habarlandy.

«Búgin Ystambulda AIBA Halyqaralyq boks qaýymdastyǵynyń Atqarýshy komıteti buǵan deıin tanystyrylymy jasalǵan Qazaqstannyń álem birinshiligin ótkizý týraly ótinimin maquldady. Álemde tanymaldylyǵy shapshań artyp otyrǵan sport túrinen álem chempıonatyn ótkizýge bizden bólek Qytaı, Anglııa, Reseı sekildi memleketter nıet tanytyp, olardyń árqaısysy Qazaqstan úshin myqty básekeles bolǵan edi. Alaıda, AIBA atqarýshy komıtetiniń músheleri qazaqstandyq tanystyrylymǵa tánti bolyp, 20 daýystyń 18-i bizdiń enshimizge tússe, 2-eýin Qytaı ıelendi», - delingen baspasóz habarynda.

Toqtala ketetin jaıt, 2016 jyly Qazaqstanda uıymdastyrylatyn álem chempıonatynda Rıoda ótetin Olımpıada oıyndaryna joldamalar sarapqa salynady, sondyqtan da bul dodanyń mańyzy arta túsetini sózsiz. Sonymen qatar, Qazaqstan buǵan deıin bokstan jastar arasyndaǵy álem chempıonatyn (Astana, 2011 jyl) jáne eresekter arasyndaǵy álem chempıonatyn (Almaty, 2013 jyl) ótkizgen bolatyn. Al osydan tórt jyl buryn áıelder arasyndaǵy bokstan qurlyqtyq chempıonat ta Qazaqstanda ótken edi.