Qazaqstan 2015 jyly Japonııa, Germanııa, Ulybrıtanııa, AQSh, Shvetsııa elderin qýyp jetedi - depýtat K. Burhanov
ASTANA. 20 sáýir. QazAqparat - 2015 jylǵa qaraı Qazaqstan halyq tabysy jaǵynan damyǵan elderdiń qataryna qosylady.
Bul týraly búgin Astanada ǵylymı-praktıkalyq konferentsııa barysynda QR Parlamenti Májilisiniń depýtaty, saıasattaný ǵylymdarynyń doktory Kamal Burhanov málim etti.
«Elimizdiń ekonomıkalyq damýy asa qarqyndy. Jan basyna shaqqanda JІÓ somasy 11 myń AQSh dollarynan asyp jyǵylady. Qazaqstan Shyǵys Eýropanyń Bolgarııa, Rýmynııa jáne taǵy basqa birqatar memleketterin basyp ozyp, Polshany qýyp jetti. Dúnıejúzilik banktiń baǵalaýy boıynsha, biz orta tabysty elderdiń qataryndamyz. 2015 jylǵa qaraı bizdiń memlekettik strategııaǵa sáıkes, JІÓ-niń deńgeıi 15 myń AQSh dollarynan asýy tıis. Dúnıejúzilik bank boıynsha, Qazaqstan halyq tabysy joǵary memleketter tobyna enedi. Onda biz Japonııa, Germanııa, Ulybrıtanııa, AQSh, Shvetsııa jáne basqa da damyǵan elderdi qýyp jetemiz», - dep atap kórsetti ol.
Qazaqstan-Reseı ýnıversıtetinde ótken «Egemendi Qazaqstannyń qalyptasýyndaǵy jas urpaqtyń jetistigi men róli» atty II-respýblıkalyq ǵylymı-tájirıbelik konferentsııaǵa Astana, Qaraǵandy, Semeı, Qyzylorda, Taraz, Pavlodar, Taldyqorǵan, Almaty qalalarynan kolledj jáne JOO-nyń stýdentteri qatysýda. Shara barysynda 200-den astam ǵylymı baıandamalar tyńdalmaq.
Onyń basty maqsaty - bilim berý uıymdarynda tárbıe jumysynyń jańa túrleri men ádisterin talqylaý, ózin-ózi basqarýdy damytý, sonymen qatar jastar qoǵamdyq birlestikteriniń ózara qarym-qatynasy boıynsha nusqaýlyqtar daıyndaý.
Konferentsııaǵa QR Parlamentiniń depýtattary, QR Bilim jáne ǵylym mınıstrliginiń ókilderi, Ulttyq qaýipsizdik komıteti men Ortalyq saılaý komıssııasy qatysýda.
