Qazaqstan 2014 jyldyń sońyna deıin qurylystyń normatıvtik bazasyn eýropalyq normalarmen 90% sáıkestendirýdi josparlaýda
ASTANA. QazAqparat - Qazaqstan 2014 jyldyń sońyna deıin qurylystyń normatıvtik bazasyn eýropalyq normalarmen 90% sáıkestendirýdi josparlap otyr.
Bul týraly búgin TMD memleketteriniń qurylys qyzmetindegi yntymaqtastyq jónindegi Úkimetaralyq keńestiń XXXVI otyrysynda QR Óńirlik damý mınıstrliginiń Qurylys jáne turǵyn úı-kommýnaldyq sharýashylyq isteri komıtetiniń tóraǵasy Vladıslav Galıev aıtty.
«Byltyr Qazaqstan Respýblıkasynyń Úkimeti qurylys salasyndaǵy normatıvtik bazasyn reformalaý tujyrymdamasyn bekitken bolatyn. Onyń iske asýy óńirlik jáne álemdik ıntegratsııalyq protsester esebinen qurylys salasynyń normatıvtik bazasyn reformalaýdyń kómegimen júzege asyrylatyn bolady. Osylaısha, 2014 jyldyń sońyna deıin Qazaqstan qurylysynyń normatıvtik bazasyn 90%-ǵa jýyq eýropalyq normalarmen úndestirýdi júzege asyrýdy josparlap otyrmyz. Bul 2015 jyldyń qańtar aıynan bastap Eýrokodtardyń jańa normalaryn qoldanýǵa múmkindik beredi», - dedi V. Galıev.
Aıta keteıik, otyrys barysynda 10 másele qaraldy. Sonymen qatar, normatıvtik-tehnıkalyq qujattardy úılestirý mindetteri talqylanyp, Keden odaǵy jáne TMD elderinde Eýrokodtardy ulttyq qosymshalarmen qoldaný, Reseı Federatsııasynyń qurylysyndaǵy tehnıkalyq retteý júıesin damytý áleýeti usynyldy, ǵımarattardyń energetıkalyq tıimdiligi salasyndaǵy Qyrǵyz Respýblıkasynyń tájirıbesi jáne basqa da máseleler qarastyryldy.
