Qazaqstan 2012 jyly da janar-jaǵarmaı eksportyna tyıymdy jalǵastyratyn bolady - S. Myńbaev
ASTANA. 7 jeltoqsan. QazAqparat /Qanat Mámetqazyuly/ - Qazaqstan 2012 jyly da janar-jaǵarmaı eksportyna tyıymdy jalǵastyratyn bolady.
Bul týraly búgin QR Parlamenti Senatynyń jalpy otyrysynda «Gaz jáne gazben jabdyqtaý týraly» zań jobasyn talqylaýdan keıin jýrnalısterge bergen suhbatynda Munaı jáne gaz mınıstri Saýat Myńbaev málim etti.
Esterińizge sala keteıik, janar-jaǵarmaı baǵasyn turaqtandyrý maqsatynda, ásirese kóktemgi egis jumystary kezindegi baǵaǵa qatysty sharalar boıynsha Úkimet ony eksporttaýǵa tyıym salǵan bolatyn. Úkimettiń sheshimimen bundaı birneshe márte tyıym keri ysyrylyp kelgen edi. Bul 2012 jyly da saqtalatyn bolyp otyr. «Onyń merzimi uzartylatyny - anyq másele», - dep atap ótti mınıstr Saýat Myńbaev.
Sonymen qatar, mınıstr qazirgi kúni Qazaqstan men Reseı arasynda 2012 jylǵy benzın jetkiziliminiń aýqymyna baılanysty kelissózderdiń de júrip jatqanyn málim etti.
«Jeltoqsan aıy boıynsha tasymaldanatyn mólsherler anyqtalǵan. Al kelesi jylǵy tasymaldanatyn aýqym boıynsha Reseıdiń ýákiletti organdarymen jumys atqarylýda. Ázirshe birlesken balans týraly eshqandaı qujatqa qol qoıylǵan emes», - dedi S. Myńbaev.
