Qazaqstan 2011 jyly tranzıttik júkten 1 mlrd. dollarǵa jýyq tabys tapty - QR KKM jaýapty hatshysy
ALMATY. 14 qyrkúıek. QazAqparat - QR Kólik jáne kommýnıkatsııa mınıstrligi 2014 jylǵa deıin 23 mlrd. dollardyń 61 ınfraqurylymdyq jobasyn júzege asyrady.
Bul týraly atalǵan mınıstrliktiń jaýapty hatshysy Jeńis Qasymbek búgin Almatyda óz jumysyn aıaqtaǵan Halyqaralyq saýda, saýdaǵa járdemdesý jáne saýdaǵa kómek máseleleri boıynsha joǵary deńgeıdegi jahandyq taqyryptyq kezdesýinde aıtty.
«Kólik ınfraqurylymyn damytý óte salmaqty úlken jumys. Oǵan bizdiń eksporttyq ónimderimizdiń aqyrǵy baǵasy baılanysty. Qazaqstan Azııa men Eýropa arasyndaǵy taýar men kommýnıkatsııa aǵynynyń ortasynda turǵandyqtan kólik tasymalynyń zor áleýetine ıe. Bizdiń ekonomıkalyq saıastymyzdyń negizgi mindeti osy áleýetti júzege asyrý. Qazir osy maqsatta avtomobıl, temir jol men áýe joly baǵyttarynda tranzıttik damyǵan jeli qurylyp otyr», - dedi J. Qasymbek.
Onyń aıtýynsha, búgingi tańda el aýmaǵy arqyly 5 jer, 4 halyqaralyq áýe dálizi ótedi. Ótken jyly respýblıka tranzıttik júkten 1 mıllıard dollarǵa jýyq tabys tapty. Bul eldiń naqty áleýetinen aıtarlyqtaı kólemde az. Sondyqtan 2014 jylǵa deıingi kólik ınfraqurlymyn damytý baǵdarlamasy boıynsha jańadan 1600 shaqyrymnan astam temir jol salynyp, 20 myń shaqyrymdaı avtomobıl joly jáne áýejaılar qaıta qurylady.
