Qazaqstan 200 transulttyq kompanııamen baılanys ornatpaq
ASTANA. QazAqparat - Qazaqstan 200 transulttyq kompanııamen baılanys ornatpaq. Mundaı usynysty búgin Úkimettiń selektorlyq rejimdegi otyrysynda QR Investıtsııalar jáne damý mınıstri Jeńis Qasymbek jasady, dep habarlaıdy QazAqparat.
Mınıstr ózi sózinde «100 naqty qadam» Ult josparynyń 55 jáne 56 qadamy, onyń ishinde 2015 jyldan beri transulttyq kompanııalar men «zákirlik ınvestorlardy» tartý boıynsha atqarylyp jatqan jumystarǵa toqtaldy.
«Ult jospary júzege asyrylǵanǵa deıin Qazaqstanǵa ekonomıkanyń 17 salasynda 52-ge jýyq transulttyq kompanııa tartyldy. Endigi rette bizdiń josparymyzda Indýstrııalandyrý baǵdarlamasy boıynsha jańa transulttyq kompanııalardy tartý mindeti tur», - dedi ol.
Onyń deregine sáıkes, 2016 jyly «Aqtaý teńiz porty» arnaıy ekonomıkalyq aımaǵynda Tenarıs transulttyq kompanııasynyń qatysýymen jalpy kólemi 13 mlrd. teńgeni quraıtyn, 90 jańa jumys ornymen qubyr óndiretin joba iske qosyldy. Sondaı-aq, osy jyldyń qazanynan bastap Gezhouba (QHR) kompanııasynyń qatysýymen Qyzylorda oblysynda jalpy kólemi 65,9 mlrd. teńgeni quraıtyn tsement ónimin shyǵaratyn óndiris ornynyń qurylys jumysy bastaldy.
«2017-2018 jyldary álem boıynsha 200 TUK-men baılanys ornatý jóninde jumysty qolǵa alý kózdelip otyr. Onyń 25-imen jumys júrgizilýde.
«Zákirlik ınvestorlardyń» qatysýymen 5 birdeı jobany iske asyrý josparlanyp otyr. Biz elimizde burynnan jumys isteıtin, qaıta ınvestıtsııa quıyp jatqan ınvestorlardyń da jumysyn únemi nazarymyzda ustaımyz. Olardyń atqaryp jatqan qyzmetine únemi monıtorıng júrgizip, baqylap otyramyz. Olarmen 200-den asa kezdesýler ótkizip, máseleler anyqtaldy. Barlyq problemalar Investıtsııalyq ombýdsmen qyzmeti arqyly qaralyp keledi»,- dedi Qasymbek.
