Qazaqstan 20 jylda Reseıden 30 mlrd dollarǵa jýyq ınvestıtsııa tartty – Jumanǵarın
ASTANA. KAZINFORM – Sońǵy 20 jylda Reseıdiń Qazaqstan ekonomıkasyna salǵan ınvestıtsııa kólemi 29,3 mlrd dollarǵa jetti. Al Qazaqstannyń Reseı ekonomıkasyna quıǵan ınvestıtsııasy shamamen 9 mlrd dollar.
Bul týraly Premer-mınıstrdiń orynbasary – Ulttyq ekonomıka mınıstri Serik Jumanǵarın Qazaqstan men Reseı prezıdentteriniń Táýelsizdik saraıyndaǵy kelissózderi aıasynda málimdedi.
Mınıstrdiń aıtýynsha, ınvestıtsııalar kólik-logıstıka salasyndaǵy jobalarmen qatar eki el arasyndaǵy ekonomıkalyq ózara is-qımyldyń da negizi bolyp qala beredi.
– Tyńaıtqyshtar salasynda «Eýrohım-Qarataý» jobasy Jambyl oblysynda júzege asyrylyp jatyr. Mundaı jobalar bizde kóp. Sondyqtan Reseı Federatsııasy tarapynan 20 jylda salynǵan 29,3 mlrd dollar jáne Qazaqstan tarapynan salynǵan shamamen 9 mlrd dollar – bizdiń ekonomıkalyq yntymaqtastyǵymyzdyń negizi, – dedi S.Jumanǵarın tilshilerge bergen suhbatynda.
Mınıstr qos taraptyń kólik salasyndaǵy yntymaqtastyqty da damytyp jatqanyn jáne ózara tarıftik jeńildikter usynyp otyrǵanyn atap ótti.
– Atap aıtqanda, aldaǵy jyldary qazaqstandyq áýe kompanııalary 130-ǵa deıin tar jáne keń fıýzelıajdy ushaq, sonyń ishinde shamamen 40 júk ushaǵyn satyp alýdy josparlap otyr. Bul jaǵdaıda biz tarıftik jeńildik emes, ımporttyq kedendik baj salyǵyn tolyq alyp tastaýdy aldyq. Óz kezegimizde biz balyq óńdeý, teńiz kemelerin, gaz tasymaldaýshy kemelerdi ákelý jáne basqa da baǵyttarǵa qatysty tıisti jeńildikter usynyp otyrmyz, – dedi ol.
Sonymen birge, Qazaqstan men Reseı keme qatynasy men kólik dálizderin damytý máselesin de talqylap jatyr.
S. Jumanǵarınniń aıtýynsha, Ertis ózeni boıynsha ázirlenip jatqan bas jospar sý teńgerimin retteýge, bolashaqta ózendi keme qatynasyna beıimdeýge, sondaı-aq Edil-Don kanaly arqyly logıstıkany jeńildetýge múmkindik beredi.
— Búgin Edil–Don kanaly arqyly keme qatynasyn Qazaqstan úshin yńǵaıly etý máselesi de kóterildi. Jalpy, biz keme qatynasy týraly kelisimdi qarastyryp jatyrmyz. Kólik-logıstıka salasy óte mańyzdy. Úshinshi elderge qatysty kedendik tranzıt týraly kelisim qazirdiń ózinde ratıfıkatsııalaý kezeńinde, — dedi Serik Jumanǵarın.
Mınıstr atom energetıkasyn bolashaq yntymaqtastyqtyń negizgi baǵyttarynyń biri dep atady. Budan bólek, taraptar gýmanıtarlyq saladaǵy birlesken jobalardy, sonyń ishinde Qazaqstan men Reseıde mektepter salý bastamalaryn jalǵastyryp jatyr.
Aıta keteıik, búgin elordada Memleket basshysy Qasym-Jomart Toqaev pen Reseı Prezıdenti Vladımır Pýtın «Qazaqstan men Reseı halyqtarynyń dostyǵy men tatý kórshiliginiń jeti negizi týraly» birlesken málimdemege qol qoıdy.
