Qazaqstan 20 jylda 439,7 mlrd dollar ınvestıtsııa tartqan
ASTANA. KAZINFORM — Ulttyq ekonomıka vıtse-mınıstri Asan Darbaev sońǵy 20 jyldaǵy Qazaqstan ekonomıkasyna tartylǵan ınvestıtsııalar kólemi men 2025 jyly kelgen qarjy aǵyny týraly baıandady.
Ulttyq banktiń derekterine sáıkes, 2005 jyldan 2025 jyldyń qyrkúıegine deıingi aralyqta Qazaqstan ekonomıkasyna 439,7 mlrd dollar tikeleı sheteldik ınvestıtsııa tartylǵan. Túrki memleketteri uıymyna múshe elderdiń úlesi — 6,3 mlrd dollar.
Al 2025 jyldyń toǵyz aıynda Qazaqstan ekonomıkasyna 14,9 mlrd dollar kóleminde tikeleı sheteldik ınvestıtsııa kelgen. Bul 2024 jyldyń dál osy kezeńimen salystyrǵanda 10,9%-ǵa artyq.
— Búgingi tańda Úkimettiń aldynda 2029 jylǵa qaraı ekonomıka ósimin eki ese arttyrý mindeti tur. Bul maqsatqa qol jetkizýdiń negizgi faktory — keminde 150 mlrd dollar tikeleı sheteldik ınvestıtsııa tartý, sondaı-aq 2029 jylǵa qaraı negizgi kapıtalǵa salynatyn ınvestıtsııalar deńgeıin JІÓ-niń 23%-yna deıin jetkizý, — dedi Asan Darbaev Túrki saýda-ónerkásip palatalary odaǵynyń úshinshi otyrysynda.
Onyń aıtýynsha, ınvestıtsııalardy qoldaý men yntalandyrý júıesin qalyptastyrý úshin 2030 jylǵa deıingi ınvestıtsııalyq saıasat tujyrymdamasy qabyldandy. Qujatqa sáıkes, kapıtal salymdary qosylǵan quny joǵary, básekege qabiletti ónimder óndirisine baǵyttalmaq.
Sonymen birge, Qazaqstan Dúnıejúzilik banktiń «Doing Business» zertteýiniń sońǵy esebinde 25-orynǵa ıe boldy. Sondaı-aq Business Ready 2025 jańa reıtınginde Qazaqstan 190 eldiń ishinde 29-oryndy ıelenip, ınvestorlar men kásipkerlerge jaǵdaı jasaý boıynsha óńirlik kóshbasshy mártebesin saqtap keledi.
Aıta keteıik, 2026 jyly Qazaqstan túrki elderiniń saýda-ónerkásip palatalary odaǵyna tóraǵalyq etedi.
Qazaqstan TMU elderine 7,6 mlrd dollarǵa ónim eksporttaǵan.