Qazaqstan 20 jańa sý qoımanyń qurylysyn 2018 jyly bastaıdy
Basqarma basshysy sóz basynda Qazaqstandaǵy sý qoımalardyń sanyna jáne olardy basqarý prıntsıpine toqtaldy.
«Osy jyldyń 1 qazanyndaǵy málimetke súıensek, Qazaqstan Respýblıkasynyń aýmaǵynda 309 sý qoımasy bar. Onyń ishinde 83-i respýblıkalyq menshikte, 191 sý qoıma kommýnaldyq menshikte, 35-i jekemenshik. Sý resýrstary komıtetiniń aýmaqtarda segiz basseındik ınspektsııasy bar. Jalpy, Qazaqstanda sý resýrstaryn basqarý prıntsıpi basseındik prıntsıpke negizdelgen. Sondyqtan da, sý resýrstary komıtetiniń basseıindik ınspektsııalary iri sý qoımalarynyń jumysyna únemi monıtorıng júrgizedi»,-dep habarlady M.Beısenov.
Eki jyl buryn osy sý resýrstary komıtetiniń basshylyǵy Qazaqstan 2020 jylǵa deıin 20 jańa sý qoıma salý týraly baǵdarlama ázirledi dep habarlaǵan edi. QazAqparat tilshisiniń osy másele tóńiregindegi suraǵyna jaýap bergen M.Beısenov ol sý qoımalardy qarjylandyrý tek 2017-2018 jyldary bastalatynyn habarlady.
«Elbasynyń tapsyrmasy boıynsha, sý resýrstaryn basqarý jónindegi memlekettik baǵdarlama aıasynda 21 sý qoıma salynady dep kózdelgen. Ázirge, ekonomıkadaǵy daǵdarysqa baılanysty, aqsha bólingen joq. Búgingi tańda «Qazsýshar» respýblıkalyq memlekettik kásipornynyń mamandary jańa sý qoımalaryn salý jónindegi tehnıkalyq negizdeme ázirlep jatyr. Qarajat 2017 jyldan bastap áýeli tehnıkalyq ekonomıkalyq negizdeme ázirleýge, sodan keıin jobalaý-smetalyq qujattamalaryn ázirleýge, 2018 jyldan bastap osy jobalardy júzege asyrýǵa aqsha bólinedi dep josparlanyp otyr. Búgingi tańda ázirge qarjy bólingen joq. Bıýdjettik kodekske sáıkes, biz jańa talaptardy oryndap, ulttyq ekonomıkalyq mınıstrliktiń qorytyndysyn alýymyz kerek», - dep túsindirdi M.Beısenov.