Qazaqstan 2 myńnan astam ınvestıtsııalyq jobany iske asyrdy – mınıstr

NUR-SULTAN. QazAqparat – Qazaqstan 100 mlrd dollar kólemindegi 2000-nan astam ınvestıtsııalyq jobany iske asyrdy. Bul jobalar qurylys salasyna, hımııa ónerkásibine, munaı-gaz, densaýlyq, áleýmettik qyzmet kórsetý salasyna qatysty boldy. Bul týraly «Ekonomıka. Saýda. Investıtsııalar» daǵdarysqa qarsy búkilálemdik konferentsııasynda QR Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

Búgin «G-Global. HHІ ǵasyr álemi» halyqaralyq kongresi aıasynda «Ekonomıka. Saýda. Investıtsııalar» daǵdarysqa qarsy búkilálemdik konferentsııasy bastaldy.

Qatysýshylar álemdik ekonomıkanyń baıaýlaýyn, ekijaqty saýdanyń damýy men ózara ınvestıtsııany, álemdik ekonomıkalyq ósimdi qalpyna keltirý, sondaı-aq makroekonomıkalyq máselelerdi talqylaıdy.

«2011 jyly 15 jeltoqsanda Qazaqstan Táýelsizdiginiń 20 jyldyǵyna oraı QR Tuńǵysh Prezıdenti Nursultan Nazarbaev G-Global halyqaralyq baılanys alańyn qurý bastamasyn kótergen bolatyn. Búgingi kongreske myqty sarapshylar qatysyp otyr. Olar qazirgi ýaqyttaǵy álemdik ekonomıkaǵa qatysty pikirlerin aıtady. Bıyl birinshi jartyjyldyqta álemdik deńgeıdegi tikeleı ınvestıtsııanyń shamamen eki ese nemese 2019 jylmen salystyrǵanda 1,5 trıllıon dollarǵa azaıǵanyn ańǵarýǵa bolady. Daǵdarystyń saldary álemdegi barlyq memleketke keri áser etýde», - dedi QR Ulttyq ekonomıka mınıstri Rýslan Dálenov.

Onyń aıtýynsha, Qazaqstan da basqa memleket sııaqty daǵdarystan zardap shegip otyr.

«Ásirese qyzmet kórsetý salasy, ıaǵnı shaǵyn járte orta bızneske tıisti dárejede qoldaý kórsetilip jatyr. Mysaly, jeńildikpen nesıe berilip, salyq jaǵynan jeńildik jasalyp, nesıe mólsherlemesi sýbsıdııalanýda. Bul sharalar ekonomıkaǵa qatysty jaǵymsyz saldardyń aldyn alady. Jalpy alǵanda Qazaqstan úkimeti áleýmettik turaqtylyqty saqtap qalý úshin ishki jáne syrtqy faktorlarǵa qatysty júıeli monıtorıng júrgizip otyr. ishki daǵdarysqa qatysty daǵdarysqa qarsy sharalar qolǵa alyndy. Ol sharalar shaǵyn jáne orta bıznesti, agroóndiris keshenin, ınfraqurylymdy damytýǵa, halyqty jumyspen qamtýǵa baǵyttalǵan», - deıdi ol.

Ol ınvestıtsııalyq seriktestikti damytý kerektigin aıtty.

«Qazaqstannyń ınvestıtsııalyq jaǵdaı jasaýǵa, joǵary sapaly adam kapıtalyn usynýǵa, joǵary tehnologııalyq ónimderdi óz aımaǵynda óndirý úshin jaqsy ınfraqurylym usynýǵa daıyn ekenin senimdi túrde aıta alamyn. Qarjylyq qyzmet kórsetý úshin «Astana» halyqaralyq qarjy ortalyǵynyń múmkindigin paıdalanýdy usynamyn. «Astana» halyqaralyq qarjy ortalyǵy Qazaqstanǵa ǵana emes, basqa da memleketterge qaýipsiz ınvestıtsııa quıý úshin búkil jaǵdaıdy jasaıdy. Qazaqstan 100 mlrd dollar kóleminde 2000-nan astam ınvestıtsııalyq jobany iske asyrdy. Bul jobalar qurylys salasyna, hımııa ónerkásibine, munaı-gaz salasyna, densaýlyq salasyna, áleýmettik qyzmet kórsetý salasyna qatysty boldy», - deıdi Rýslan Dálenov.