Qazaqstan 1967 jylǵy shekarada Palestına memleketin qurý ustanymynan aınymaıdy
ASTANA. KAZINFORM — Elimizdiń syrtqy saıası vedomstvosy Qazaqstannyń Palestına-Izraıl qaqtyǵysyna qatysty ustanymyn bildirdi.
Keshe Qazaqstan Respýblıkasy Premer-Mınıstriniń orynbasary — Syrtqy ister mınıstri Murat Nurtileý Palestınadaǵy jaǵdaıǵa arnalǵan Islam yntymaqtastyǵy uıymynyń Syrtqy ister mınıstrleri keńesiniń tótenshe sessııasyna qatysty.
Sessııa jumysyna IYU elderiniń, onyń ishinde Saýd Arabııasy, Kýveıt, Katar, Iordanııa, Iran, Túrkııa, Marokko syrtqy saıası vedomstvolarynyń basshylary qatysty.
SІMK barysynda IYU-ǵa múshe memleketter Gaza sektorynda atysty dereý toqtatýǵa shaqyrdy jáne Palestına-Izraıl daǵdarysyn tezirek sheshý qajettigin alǵa tartty.
Murat Nurtileý óz sózinde Gaza sektoryndaǵy uzaqqa sozylǵan gýmanıtarlyq apatqa baılanysty erekshe alańdaýshylyq bildirdi.
Odan shyǵýdyń birden-bir joly — áskerı is-qımyldy jaqyn arada toqtatý bolýy múmkin.
Qazaqstan óńirdiń búkil halqy úshin beıbitshilik, turaqtylyq pen qaýipsizdikke qol jetkizý úshin kúsh-jigerdi kúsheıtýge shaqyrdy, bul aldaǵy qasıetti Ramazan aıy qarsańynda erekshe mańyzdy.
«Qazaqstan syrtqy saıası vedomstvosynyń basshysy kópjylǵy qaqtyǵystyń jalǵyz sheshimi retinde BUU bekitken „eki halyq úshin eki memleket“ formýlasy negizinde 1967 jylǵy shekarada Palestına memleketin qurý boıynsha Qazaqstannyń ózgermeıtin ustanymyn rastady» deıdi SІM baspasóz qyzmetinen.
Іs-shara musylman elderiniń Palestına halqymen úndestigin jáne qaqtyǵysty tezirek toqtatý úshin belsendi áreket etýge umtylysyn kórsetti.
