Qazaqstan 163 eldiń qatarynda mıgratsııalyq tártipsizdikti joıýǵa baǵyttalǵan kelisimshartty maquldady
Kóshi-qon jónindegi kelisimshartty qabyldaýǵa arnalǵan úkimetaralyq konferentsııaǵa Qazaqstan delegatsııasy qatysty.
QR Eńbek jáne halyqty áleýmettik qorǵaý mınıstrliginiń resmı saıtynda atap ótilgendeı, qazaqstandyq delegatsııanyń quramynda QR Eńbek jáne halyqty áleýmettik qorǵaý vıtse-mınıstri Nurjan Áltaev bar.
«Qazaqstan Qaýipsiz, rettelgen jáne zańdy mıgratsııa jónindegi jahandyq kelisimshartqa qosylýdy qoldaıdy. Jahandyq kelisimshartta múshe memleketterdiń halyqaralyq kóshi-qon salasyndaǵy yntymaqtastyqty jaqsartýǵa ujymdyq beıildiligi atap ótilýde. Birqatar teris faktorlarǵa qaramastan, mıgratsııa gúldený, ınnovatsııalar jáne turaqty damý kózine aınala alady. Halyqaralyq mıgratsııa BUU memleketterin bólmeı, kerisinshe, biriktirip otyrǵany óte mańyzdy. Jahandyq kelisimshart mıgratsııaǵa qatysty jalpy túsinik, mindetter jáne maqsattar tutastyǵyn ornatady», - delingen Eńbek jáne halyqty áleýmettik qorǵaý mınıstrliginiń habarlamasynda.
BUU Bas hatshysy Antonıý Gýterrısh Kóshi-qon jónindegi jahandyq kelisimshartty tarıhı dep atap, ol álemdegi mıgratsııalyq tártipsizdikti joıýǵa kómektesetin «jol kartasy» bolyp tabylatynyn aıtyp ótti.
Búginde álemde 258 mln adam mıgrant bolyp tabylady, ıaǵnı ózge elde turyp, eńbek etip júr. Bosqyndarǵa qaraǵanda, mıgranttar basqa elge qýdalaý nemese ólim qaýpinen emes, óz ómirin jaqsartý, jaqsy jumys tabý nemese bilim alý úshin barady.
Ádette, kóptegen mıgranttar kók tıynǵa eńbek etip, qaýipti jaǵdaılarda jumys isteýge májbúr. Jumysqa turý úshin olar joǵary komıssııalyq tólem jasaıdy. Buǵan qosa, sońǵy jyldary mıgranttar olardy qabyldaıtyn elderde kemsitý jáne qastyqqa tap bolyp otyrady.
Olaı bolǵanymen, mıgratsııanyń kóptegen artyqshylyqtary da bar: ol jumys kúshiniń jetispeýshiligi problemasyn sheshedi, adamdardyń mádenı, ekonomıkalyq jáne áleýmettik salalarda ózara árekettestigine septigin tıgizedi. Týǵan elderine oralǵan mıgranttar jınaǵan tájirıbesi men ǵylymı-tehnıkalyq áleýetin paıdalanady.
Antonıý Gýterrısh jańa kelisimshartty kópshiliktiń qoldaǵanyn jáne onyń akklamatsııa jolymen qabyldanǵanyn quptady. Ol kelisimsharttyń zańdy túrde mindetti qujat bolyp tabylmaıtynyn, mıgratsııa salasyndaǵy halyqaralyq yntymaqtastyqtyń negizi bolyp tabylatynyn atap ótti.
Foto MOM/R.Rodrıgez
