Qazaqstan 14 elmen áýe qatynasyn qaıta jandandyrdy

NUR-SULTAN. QazAqparat – Búgingi kúni 14 elmen áýe qatynasy qalypqa keltirilip, reıster sany aptasyna 95-ke deıin kóbeıtildi. Bul týraly Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Búgingi kúni 14 elmen áýe qatynasy qalypqa keltirilip, reıster sany aptasyna 95-ke deıin kóbeıtildi. Eń kóp jolaýshylar sany Nur-Sultan jáne Almaty qalalaryna keledi, 6 qazannan bastap 1 mıllıonnan astam adam memlekettik shekaradan ótti. 203 myń adam PTR-testen ótip, 1042 naýqas anyqtaldy», - deıdi QR Densaýlyq saqtaý mınıstri Alekseı Tsoı.

Onyń aıtýynsha, elimizde qyrkúıek pen qańtar aralyǵynda KVI-di genomdyq zertteý nátıjeleri boıynsha koronavırýstyń jańa shtamdary («Brıtandyq», «Ońtústik Afrıka», «Brazılııalyq») anyqtalmady.

«Qazirgi ýaqytta aqpan-naýryz aılarynda PTR-testiń oń nátıjelerine genetıkalyq zertteý júrgizilip jatyr. Onyń mýtatsııaǵa ushyraǵan-ushyramaǵany anyqtalady», - deıdi ol.