Qazaqstan 112 munaı-gaz ýchaskesin aýktsıonǵa shyǵarady
ASTANA. KAZINFORM — Energetıka mınıstrligi kómirsýtekter boıynsha jer qoınaýyn paıdalaný quqyǵyn berý jónindegi kezekti elektrondyq aýktsıon ótkiziletinin habarlady. Aýktsıon 25 jeltoqsanda e-Qazyna elektrondyq alańynda ótedi.
Qatysýǵa ótinimder 18 qarashaǵa deıin qabyldanady. Aýktsıondardy ótkizý Memleket basshysynyń jer qoınaýy ýchaskelerin tıimdi paıdalanýdy arttyrý jónindegi tapsyrmasyn iske asyrý aıasynda júrgizilmek.
Bul geologııalyq barlaýǵa ınvestıtsııalar tartýǵa jáne munaı-gaz salasyn odan ári damytýǵa jaǵdaı jasaıdy. Aldaǵy jeltoqsan aýktsıonyna 112 ýchaskeniń 56-sy shyǵarylady. Olar Qazaqstannyń Mańǵystaý, Aqtóbe, Atyraý, Batys Qazaqstan, Ulytaý, Qostanaı jáne Qyzylorda oblystarynda ornalasqan. Ýchaskeler boıynsha barlaý jáne óndirý quqyǵyn, sondaı-aq tikeleı kómirsýtekterdi óndirý quqyǵyn berý kózdelgen.
Tizimge Begimbet 1, Batys Ulytaý, Sholaqsaı, Basqumaq, Qarasý, Jasqaırat, Ústirt ýchaskeleri, Qosaral, Maılykól, Qaraqamys, Qarakól jáne basqa da ýchaskeler kiredi. Bul rette jer qoınaýyn paıdalaný quqyǵyn alý aıtarlyqtaı ınvestıtsııalyq mindettemelerdi kózdeıdi.
— Ár ýchaske boıynsha geologııalyq barlaý jumystarynyń, onyń ishinde seısmıkalyq barlaý men uńǵymalardy burǵylaýdyń eń tómengi kólemderi belgilengen. Aýktsıon jeńimpazdary shart jasalǵan kúnnen bastap bir jyl ishinde barlaý jumystarynyń jobasyn ázirleýge, úsh jyl ishinde 2D seısmıkalyq barlaý boıynsha belgilengen talaptardy oryndaýǵa jáne tórt jyl ishinde, eger naqty ýchaskeniń sharttarynda kózdelse, keminde bir uńǵymany burǵylaý boıynsha eń tómengi talaptardy oryndaýǵa tıis, — delingen habarlamada.
Adamı kapıtaldy, ǵylymdy jáne óńirlik ınfraqurylymdy damytý boıynsha da talaptar belgilengen. Óndirý kezeńinde jer qoınaýyn paıdalanýshy ótken jylǵy óndirý shyǵyndarynyń 1%-yn qazaqstandyq kadrlardy oqytýǵa jáne taǵy 1%-yn Qazaqstandaǵy ǵylymı-zertteý, ǵylymı-tehnıkalyq jáne tájirıbelik-konstrýktorlyq jumystarǵa baǵyttaýǵa tıis.
Budan bólek, shart boıynsha ınvestıtsııalardyń 1%-y óńirdiń áleýmettik-ekonomıkalyq damýy men ınfraqurylymyn damytýǵa kózdeledi. Sondaı-aq jergilikti qamtý boıynsha talaptar belgilengen: jumystarda – keminde 70%, qyzmetterde – 70%, taýarlarda – 30%. Qazaqstandyq kadrlardyń úlesi basshylar men olardyń orynbasarlary arasynda keminde 80%, qurylymdyq bólimsheler basshylary arasynda 90%, al mamandar men bilikti jumysshylar arasynda 100% bolýy tıis. Іri ken oryndary úshin qosymsha talaptar kózdelgen.
Eger bastapqy geologııalyq qorlardyń kólemi 100 mln tonnadan astam munaıdy nemese 50 mlrd tekshe metrden astam tabıǵı gazdy qurasa, shartta óńdeý óndiristerin qurý nemese jańǵyrtý, óndirilgen kómirsýtekterdi Qazaqstanda óńdeýge jetkizý ne ózge de ınvestıtsııalyq nemese áleýmettik-ekonomıkalyq jobany iske asyrý jónindegi mindettemelerdiń biri kózdelýge tıis.
Osylaısha, jeltoqsandaǵy 56 ýchaskeden turatyn aýktsıondy eskere otyryp, Qazaqstan jyl sońyna deıin kómirsýtekter boıynsha jer qoınaýyn paıdalaný quqyǵyn alý úshin barlyǵy 112 jer qoınaýy ýchaskesin aýktsıonǵa shyǵarady. Bul ýchaskeler boıynsha geologııalyq barlaý, burǵylaý, ınvestıtsııa salý, qazaqstandyq kadrlardy daıarlaý, ǵylymdy damytý, jergilikti ınfraqurylymdy damytý jáne jergilikti qamtýdy arttyrý jónindegi mindettemeler kózdelgen.
Aıta keteıik, Mańǵystaýda jańa munaı ken ornyn anyqtaýǵa baǵyttalǵan burǵylaý bastaldy.
