Qazaqstan 1,1 myńnan astam jalǵan sertıfıkattyń kúshin joıdy

Qazaqstanda ónim qaýipsizdigi tolyq tekserilmeı el aýmaǵyna ákelinetin jalǵan sertıfıkattar men sáıkestik deklaratsııalaryna baqylaý kúsheıtilip jatyr. Tehnıkalyq retteý jáne metrologııa komıtetiniń málimetinshe, mundaı zań buzýdyń basym bóligi Qyrǵyz Respýblıkasynda rásimdelgen qujattarǵa qatysty.

Saýda jáne ıntegratsııa mınıstrligi Tehnıkalyq retteý jáne metrologııa komıteti tóraǵasynyń orynbasary Baýyrjan Qasymovtyń aıtýynsha, másele júıeli sıpat alyp, tutynýshylardyń qaýipsizdigine de, naryqtaǵy adal básekelestikke de tikeleı áser etip otyr.

— Keıbir qujattar ónimge qajetti synaq júrgizilmesten berilgen. Birqatar jaǵdaıda sertıfıkattar taýardy naqty tekserýsiz, qashyqtan rásimdelgen. Mundaı qujattar Qazaqstan naryǵyna ónimdi uzaq ýaqyt boıy baqylaýsyz ákelýge múmkindik bergen, — dedi Baýyrjan Qasymov.

Komıtettiń deregine sáıkes, búginde Qazaqstan EAEO elderi bergen 1113 sáıkestik sertıfıkaty men deklaratsııasynyń kúshin joıdy. Onyń ishinde 742 qujat, ıaǵnı zańbuzýshylyqtardyń eń kóp úlesi Qyrǵyzstanǵa tıesili. Salystyrmaly túrde Reseı boıynsha 244, Belarýs boıynsha 11 zań buzý anyqtalǵan.

Másele tek formaldy sáıkessizdiktermen shektelmeıdi. Tekserý barysynda mamandar qaýipsizdik talaptary men tańbalaý normalary buzylǵan ónimderdi anyqtaǵan. Keıbir azyq-túlik ónimderinen ishek taıaqshalary tobyna jatatyn bakterııalar men jekelegen taǵamdyq qospalardyń ruqsat etilgen mólsherden artyq ekeni belgili boldy. Sonymen qatar birqatar taýar óndirilgen kúni men saqtaý sharttary kórsetilmeı satylǵan.

Komıtet málimetinshe, buǵan deıin Qyrǵyzstandaǵy jekelegen sertıfıkattaý organdary arqyly ónim qaýipsizdigi naqty rastalmaı-aq deklaratsııalar jappaı rásimdelip kelgen. Qazaqstan tarapy aralasqannan keıin bul baǵyttaǵy jaǵdaı ózgere bastaǵan.

— Biz qyrǵyz áriptesterimizben birlesip, osy saladaǵy tártipti kúsheıtý boıynsha aýqymdy jumys júrgizdik. Qyrǵyzstan zańnamaǵa ózgerister engizip, deklaratsııalardy tirkeý fýnktsııasyn memlekettik uıymǵa berdi. Bul qujattardy zańsyz rásimdeý múmkindigin aıtarlyqtaı qysqartty, — dedi Baýyrjan Qasymov.

Tehnıkalyq retteý jáne metrologııa komıtetiniń materıaldary negizinde Qyrǵyz tarapy sáıkestikti rastaý jónindegi segiz organnyń akkredıtteý attestatyn joıdy. Atalǵan uıymdar EAEO-nyń Biryńǵaı tiziliminen shyǵaryldy.

Sonymen qatar Qazaqstan ishki baqylaýdy da kúsheıtip jatyr. Sáıkestikti baǵalaý rásimderiniń barlyǵy «E-KTRM» júıesi arqyly tsıfrlandyrylǵan. Al memlekettik kirister organdary taýarlardy kedendik rásimdeý kezinde qujattardy tekserý talaptaryn qatańdatty.

Mindetti rásimderden ótpeı-aq sertıfıkat rásimdeýdi usynatyn ınternet-resýrstardy buǵattaý jumystary da jalǵasyp jatyr. Qazirgi ýaqytta Qazaqstanda osyndaı 76 saıt buǵattalǵan.

Sońǵy jaǵdaılardyń biri Shymkent qalasynda tirkeldi. Germanııadan shokolad glazýrin ákelý kezinde mamandar Qyrǵyzstanda rásimdelgen, alaıda EAEO-nyń Biryńǵaı tiziliminde tirkelmegen sáıkestik deklaratsııasyn anyqtady. Tekserý nátıjesinde atalǵan qujattyń kúshi joıyldy. 

Aıta ketelik EAEO aýmaǵynda taýar tranzıtin navıgatsııalyq plomba arqyly baqylaýǵa arnalǵan zań qabyldanǵan edi.