Qazaqstan 11 aıda 73,4 mln tonna munaı eksporttady

ASTANA. KAZINFORM – Bıyl Qazaqstan munaı eksporttaý men gaz óndirýdiń jyldyq josparyn oıdaǵydaı oryndady. Energetıka mınıstriniń orynbasary Suńǵat Esimhanov Úkimet otyrysynda osyndaı málimet aıtty. 

- Esepti kezeńde munaı jáne gaz kondensatyn óndirý kólemi ótken jyldyń sáıkes kezeńimen salystyrǵanda 114,1% boldy. 11 aıdyń qorytyndysy boıynsha munaı eksporty 73,4 mln tonna nemese ótken jyldyń sáıkes kezeńine 116,1%, - dedi vıtse-mınıstr.

Aıtýynsha, bıylǵy jospar 70,5 mln tonna munaı eksporttaý bolǵan kórinedi.

- Esepti kezeńde 62,8 mlrd tekshe metr gaz óndirildi. Bul ótken jyldyń sáıkes kezeńimen salystyrǵanda 116,7%. Bıylǵy 62,8 mlrd tekshe metr kólemindegi gaz óndirý jospary da oryndaldy. Suıytylǵan munaı gazyn óndirý kólemi 2,8 mln tonna nemese ótken jyldyń sáıkes kezeńimen salystyrǵanda 101,8%. El aýmaǵy arqyly gaz tranzıtiniń kólemi 64,5 mlrd tekshe metr boldy. Bul ótken jyldyń sáıkes kezeńiniń 100,9%-y, - dedi Suńǵat Esimhanov.

Aıta keteıik, búgin Úkimette 11 aıdyń áleýmettik-ekonomıkalyq damý qorytyndysy qaralyp jatyr.