Qazaqstan 106 elge óńdelgen ónim eksporttaıdy

ASTANA. QazAqparat – Qazaqstan 106 elge óńdelgen ónim eksporttaıdy. Bul týraly Saýda jáne ıntegratsııa vıtse-mınıstri Qaırat Tórebaev málim etti, dep habarlaıdy QazAqparat tilshisi.

«Biz úshin óńdeý ónimderi eksportyn 2025 jyly 41 mlrd AQSh dollaryna jetkizý asa mańyzdy. Ótken jyly 26,5 mlrd AQSh dollary boldy. Bıyl 1-toqsanda óńdelgen ónimniń syrtqy saýdasynyń jalpy kólemi 18,8 mlrd AQSh dollaryn qurady. Bul ótken jylǵy sáıkes kezdegi kórsetkishten 32 paıyzǵa joǵary. Sońǵy úsh jylda bul kórsetkish 63 paıyzǵa ósti. Osy kezeńde shıkizattyq emes taýarlardyń eksporty 5,9 mlrd AQSh dollaryn qurady. Ósim 7,6 paıyzdy kórsetti», - dedi ol Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, eksporttyń ósýi, sondaı-aq taýar pozıtsııalarynyń sanyn keńeıtý esebinen de qamtamasyz etildi. Osy jyldyń birinshi toqsanynda eksportqa jetkiziletin taýarlardyń nomenklatýrasy 767 taýar pozıtsııasyna ulǵaıdy.

«Eksport geografııasy da keńeıip keledi. Osy jyly qazaqstandyq shıkizattyq emes eksport álemniń 106 eline jóneltildi. Bul 2022 jylmen salystyrǵanda 6 elge kóp. Óńdelgen taýarlardyń negizgi ımporttaýshylary Reseı, Qytaı, Ózbekstan, Túrkııa, Nıderland, Ulybrıtanııa, Japonııa, Qyrǵyzstan, Grýzııa, Aýǵanstan boldy», - dedi Qaırat Tórebaev.

Vıtse-mınıstrdiń dereginshe, elimiz eksportqa mys, mys katodyn, ferroqorytpalar, ýran, munaı ónimmderin, kúmis, un, myrysh, tabıǵı gaz shyǵarady.