Qazaqstan 100 paıyz elektrondyq kedendik deklaratsııalaýǵa kóshti
«Salyq jáne keden salalarynda tsıfrlyq tehnologııalardy engizý boıynsha jumystar jalǵasyp jatyr. Tsıfrlandyrý qoljetimdi onlaın servıster esebinen bıznes qyzmetin jeńildetip, ekonomıkalyq quldyraýdyń saldaryn azaıtýǵa múmkindik bergenin atap ótkim keledi. Buǵan deıin bıznes tarapynan kedenniń atyna protsestiń ashyq bolmaýyna jáne qaǵaz túrinde deklaratsııalaý kezindegi qıyndyqtarǵa qatysty kóptegen másele bolǵany jasyryn emes.
Osyǵan baılanysty elektrondyq deklaratsııalaý formatyna kóshý júzege asyryldy. Sonymen, saýda rásimderin ońaılatý maqsatynda buryn «ASTANA-1» kedendik jáne salyqtyq ákimshilendirýdiń aqparattyq avtomattandyrylǵan júıesi engizilip, bul 100 paıyz elektrondyq kedendik deklaratsııalaýǵa kóshý boıynsha halyqaralyq mindettemelerdiń oryndalýyn qamtamasyz etti», - dedi Eldos Saýdabaev Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, 2022 jylǵy qyrkúıekte úshinshi elderge júrip ótetin tranzıttik taýarlardy kedendik deklaratsııalaýǵa baılanysty kedendik operatsııalardyń hronometrajy júrgizilip, ulttyq temirjol tasymaldaýshysy men memlekettik kirister organdarynyń aqparattyq júıeleriniń ózara is-qımyl shemasy ázirlendi.
Bul ózara is-qımyl shemasy taýarlardyń kelgeni týraly habarlamany, aldyn ala aqparattandyrý negizinde tranzıtti deklaratsııalaýdy, tranzıttik deklaratsııalardy avtomatty tirkeýdi jáne shyǵarýdy kózdeıdi. Bir konteınerlik poezdy rásimdeý ýaqyty 3 saǵattan 30 mınýtqa deıin qysqardy.
«Qazir Qazaqstan – Qytaı shekarasyndaǵy «Altynkól» jáne «Dostyq» ótkizý pýnktterinde memlekettik kirister organdary men ulttyq temirjol tasymaldaýshysynyń aqparattyq júıeleriniń ıntegratsııasyna testileý júrgizilip jatyr. Bul sharalar kedendik rásimderdi jeńildetýge baǵyttalǵan», - dedi Eldos Saýdabaev.
