Qazaqstan 100 myń gektar jasandy orman qurý jobasyn bastaıdy
ASTANA. KAZINFORM – «Ortalyq Azııanyń Jasyl beldeýi» bastamasyn iske asyrý sheńberinde elimizdiń aýmaǵynda 1 mln gektardan astam jerde orman ekpelerin qurý josparlanyp otyr.
Qazaqstan Respýblıkasynyń Ekologııa jáne tabıǵı resýrstar mınıstrligi men Private Company «First Carbon Group Ltd.» orman-klımattyq jobalar jáne kómirtek birlikteri salasyndaǵy yntymaqtastyq týraly ózara túsinistik týraly memorandýmǵa qol qoıdy.
— Qujat orman ekpelerin qurý, degradatsııaǵa ushyraǵan jerler men ekojúıelerdi qalpyna keltirý, parnıktik gazdardyń sińirilýin ulǵaıtý, kómirtek birlikterin qalyptastyrý, sondaı-aq halyqaralyq klımattyq jáne ınvestıtsııalyq qarjylandyrýdy tartý jobalaryn iske asyrýǵa múmkindik beretin negizdi qalyptastyrady.
Osy memorandým sheńberinde keıinnen aýqymyn keńeıtý múmkindigimen shamamen 100 myń gektar aýmaqta jasandy ormandar qurý kózdeledi.
Jalpy, «Ortalyq Azııanyń Jasyl beldeýi» bastamasyn iske asyrý sheńberinde elimizdiń aýmaǵynda 1 mln gektardan astam jerde orman ekpelerin qurý josparlanyp otyr, — delingen Ekologııa mınıstrligi habarlamasynda.
Atalǵan bastamany iske asyrý Qazaqstannyń orman sharýashylyǵyn damytý úshin strategııalyq mańyzǵa ıe. Mundaı tásil ınvestıtsııalar tartý esebinen orman alqaptaryn ulǵaıtýǵa, zamanaýı tehnologııalardy engizýge jáne eldegi ekologııalyq jaǵdaıdy jaqsartýǵa múmkindik beredi.
Memorandýmǵa qol qoıý Qazaqstanda orman-klımattyq jobalardy iske asyrýdyń júıeli tásilin qalyptastyrý jolyndaǵy qadamdardyń biri bolyp tabylady. Bul rette orman ekojúıelerin qalpyna keltirý jáne keńeıtý tabıǵatty qorǵaý, klımattyq jáne ınvestıtsııalyq mindetterdi qatar qamtıtyn baǵyt retinde qarastyrylady.
Aıta ketelik Qazaqstan Ortalyq Azııada orman beldeýlerin qurýǵa qatysty jańa bastama kótergen edi.
