Qazaqstan 10 jylda qorshaǵan ortany qorǵaýǵa 370 mlrd teńgege jýyq ınvestıtsııa saldy
NUR-SULTAN. QazAqparat – Qazaqstan 10 jylda qorshaǵan ortany qorǵaýǵa 370 mlrd teńgege jýyq ınvestıtsııa saldy, dep habarlaıdy QazAqparat tilshisi finprom.kz-ke silteme jasap.
Osy jyldyń qańtar-tamyzynda qorshaǵan ortany qorǵaýǵa jumsalǵan ınvestıtsııa kólemi jyl ishinde 24 paıyzǵa artyp, 92,5 mlrd teńgege jetti. Ótken jyldyń osyndaı kezeńindegi ınvestıtsııa somasy 74,6 mlrd teńge bolǵan edi. Bul 2018 jylǵy somadan 2 ese kóp. Sońǵy 3 jylda sektorǵa salynǵan ınvestıtsııa kólemi ortasha eseppen jylyna 94,7 paıyzǵa artyp keledi. Jalpy, sońǵy 10 jylda elimizde qorshaǵan ortany qorǵaýǵa 368,8 mlrd teńge jumsaldy.
Óńirlik shekte qorshaǵan ortany qorǵaýǵa Aqmola oblysy mol qarjy quıyp otyr. Aımaq ótken jylmen salystyrǵanda ınvestıtsııa kólemin 2 esege arttyryp, 27,5 mlrd teńgege jetkizdi. Al Shyǵys Qazaqstan oblysynda jyl ishinde ınvestıtsııa somasy 5,4 esege ulǵaıyp, 10,1 mlrd teńgeni qurady. Úzdik úshtiktiń qatarynda Mańǵystaý oblysy da bar. Bul óńir sektorǵa 7,8 mlrd teńge jaratqan.
Qazaqstan óńirleri arasynda tek Almaty oblysy ǵana qorshaǵan ortany qorǵaýǵa ınvestıtsııa salmady. Al bul óńirdiń aýasynyń lastanýy joǵary qalalary bar aımaqqa kiretindigi belgili.
Jalpy aýasynyń lastaný deńgeıi joǵary qalalar qatarynda Aqtóbe, Óskemen, Atyraý, Nur-Sultan, Qaraǵandy, Balqash, Shymkent, Temirtaý jáne Semeı qalalary bar.
