Qazaqstan 10 jylda qansha ǵalymdy joǵaltqany belgili boldy

ASTANA. QazAqparat – Búgin elordada ótip jatqan konferentsııada Ǵylym jáne joǵary bilim mınıstri Saıasat Nurbek 10 jylda elden ketken ǵalymdarǵa qatysty túsinik berdi, dep habarlaıdy QazAqparat tilshisi.

«Biz ǵalymdarymyzdyń birazynan, ıaǵnı ǵylymmen aınalysatyn jastaǵy adamdardyń negizgi bóligin joǵalttyq. Olar keńestik kezeńde ǵylymı uıymdar daıyndaǵan ǵalymdardyń úshinshi tolqyny edi. Odaq ydyraǵannan keıin ǵalymdar turaqtamady. Qarapaıym statıstıkaǵa súıensek, 1990 jyly bizde ǵylymı-zertteý ınstıtýttarynyń 52 000 qyzmetkeri men ǵylymmen aınalysqan professorlyq-oqytýshylyq quramy resmı túrde tirkelgen. 2000 jyly nemese 10 jyldan keıin 12 myńy qaldy. Naqty aıtqanda 30 myńnan astam adamdy joǵalttyq», - dedi S. Nurbek Qazaqstanda jańartylatyn energııa kózderin damytýǵa arnalǵan konferentsııada.

Osy oraıda mınıstr qazir shetelge ketken ǵalymdar ǵylymı jobalarmen tabysty túrde aınalysyp jatqanyn aıtty.

«Qazir Qazaqstan joǵalǵan kadrlyq áleýetti qalpyna keltirýge kiristi. «Bolashaq» baǵdarlamasy, Nazarbaev Ýnıversıteti bar, sondaı-aq ǵalymdardyń jańa býyny ósip kele jatyr. Biz jalaqyny da, áleýmettik paketti de aıtarlyqtaı kóbeıtip jatyrmyz. Jańa zańda ǵalymdarǵa qoldaý kórsetý baǵytynda áleýmettik qamtamasyz etý men tıisti paket boıynsha jeke blok qamtylǵan», - dedi vedomsvo basshysy.

Budan buryn habarlanǵandaı, bıyl kúzde Parlament qaraýyna «Ǵylym jáne tehnıkalyq saıasat týraly» zań jobasy usynylady.