Qazaqstan 1 mlrd dollar dári-dármekti syrttan satyp alady - Nursultan Nazarbaev

ASTANA. QazAqparat - Búgin Qazaqstan - Polsha bıznes forýmyna qatysqan Memleket basshysy Nursultan Nazarbaev farmatsevtıkalyq salany damytý máselesine basa nazar aýdardy. Otyrysqa Qazaqstanǵa memlekettik saparmen kelgen Polsha prezıdenti Andjeı Dýda da qatysty, dep xabarlaıdy QazAqparat tilshisi.

Óz sózinde Nursultan Nazarbaev farmatsevtıka salasyndaǵy polıak kompanııalarynyń tabysty eńbegine toqtalyp: «Qazirgi kezde Qazaqstan syrttan dári-dármekterdi 1 mlrd dollarǵa ımporttaıdy. Sol sebepti óz jerimizde zaýyt pen fabrıkalardy salý asa qajet. Ol úshin biz barlyq jaǵdaılardy jasaýǵa daıynbyz», - dep atap kórsetti Nursultan Nazarbaev. 

Aıta ketken jón, búginde Qazaqstan naryǵynda "PolPharma" atty polıak kompanııasy jumys isteıdi. Shymkent qalasynda onyń farmatsevtıkalyq zaýyty da bar.

Jalpy Polshanyń Ortalyq Azııa elderimen jasaǵan jalpy taýar aınalymynyń 80 paıyzy Qazaqstanmen aradaǵy alys-beriske tıesili. Sońǵy on jyldyń ishinde atalǵan memleketten kelgen ınvestıtsııalardyń jalpy kólemi 200 mln dollardy qurady. Al eki jaqty taýar aınalymy 783 mln dollarǵa jetti.