Qazaqshany ǵylym tiline aınaldyrýǵa baǵyttalǵan arnaıy baza qurylady

NUR-SULTAN. QazAqparat – Qazaq tilin ǵylym tiline aınaldyrýǵa baǵyttalǵan ǵylymı-lıngvıstıkalyq baza qurylady. Mundaı jospardy Mádenıet jáne sport mınıstrliginiń alqa májilisinde vıtse-mınıstr Nurǵısa Dáýeshov málim etti, dep habarlaıdy QazAqparat tilshisi.

«Qazaqstan Respýblıkasyndaǵy til saıasatyn iske asyrýdyń 2020-2025 jyldarǵa arnalǵan memlekettik baǵdarlamasyna ózgerister engiziledi. Atap aıtqanda, «Abaı ınstıtýty» atty Qazaqstanda jáne shetelderde qazaq tilin úıretý jáne ilgeriletý baǵdarlamasyn jetildirip, qoldanys aıasyn keńeıtý josparlanǵan. Odan bólek qazaq tili ulttyq korpýsynyń pýblıtsıstıkalyq mátinderiniń kishi korpýsyn ázirleý jumystaryn júrgiziledi», - dedi ol.

Sondaı-aq, Qazaqstan Respýblıkasy azamattarynyń aty-jónderin latyn negizdi álipbımen jazylý erejeleri ázirlenbek.

«Qazaqstan Respýblıkasynyń aýmaǵyndaǵy geografııalyq obektilerdiń jáne olardyń quramdas bólikteriniń ataýyn latyn grafıkasy negizinde standarttalady. Sondaı-aq, qazaq tilin ǵylym tiline aınaldyrýǵa baǵyttalǵan ǵylymı-lıngvıstıkalyq bazasyn qurý kózdelgen», - dedi ol.