Qazaqsha Wikipedia-ny damytý qazaq tilindegi aqparattardy kóbeıtýge múmkindik beredi - Wikipedia Ortalyq keńsesiniń ókili
ALMATY. 16 maýsym. QazAqparat /Erbol Azanbek/ - Qazaqsha Wikipedia -ny damytý qazaq tilindegi aqparattar qoryn ulǵaıtýǵa múmkindik beredi. Wikipedia-da eń bastysy óz ana tilinde málimet izdegender qajetti aqparatty erkin tabýǵa qol jetkizedi.
Bul týraly búgin Almatyǵa qazaqsha Wikipedia-ny damytý jobasynyń tanystyrylymyna qatysý úshin kelgen Wikipedia Foundation (AQSh) qorynyń Senimdi ókilder keńesiniń tóraǵasy Tıng Chen QazAqparatqa bergen suhbaty barysynda aıtty.
Onyń sózine qaraǵanda, Wikipedia-daǵy qazaq tilindegi aqparat qory ókinishke oraı Afrıka elderiniń deńgeıimen birdeı. «Búgin jańa jobanyń bastalǵany týraly jarııalanyp jatyr. Aldaǵy ýaqytta damıdy dep senemiz», -dedi Tıng Chen myrza. Onyń aıtýynsha, Qazaqstanda Wikipedia-ny damytýda, ashyq entsıklopedıany damytyp úlgergen elderge elikteýdiń qajeti joq. «Tek olardyń úlgisin paıdalanýǵa bolady. Wikipedia eriktiler kómegimen damıtyn bolǵan soń, eriktiler ózderi bas qosyp, jınalyp qaısysynan bastaý kerek, sony sheshse bolady. Qazaqstan bólek, ózindik damý baǵyty bar memleket. Sondyqtan Wikipedia-ny damytýdy ishki suranysqa saı jasaý qajet»,- dedi Wikipedia Foundation ókili.
Ol óz sózinde Wikipedia-ny damytýǵa yqylas tanytyp otyrǵan «Wikibilim» qoǵamdyq qorynyń jumysyna qoldaý bildiretindikterin atap ótti. «Biz birinshiden keńes berý, ekinshi túrli joldarmen qoldaý bildiremiz. Meniń búgingi ashylýǵa kelýim qoldaý maqsatyn júzege asyrýǵa baılanysty»,- dedi Wikipedia Ortalyq keńsesiniń qyzmetkeri.
