«Qazaqsha Vıkıpedıa» jobasyndaǵy maqalalardyń sany 117 myńǵa jetti
ASTANA. 16 jeltoqsan. QazAqparat - «Qazaqsha Vıkıpedıa» jobasy Qazaqstan Respýblıkasy Úkimetiniń patronajymen jáne el Premer-Mınıstri Kárim Másimovtiń qoldaýymen júzege asyrylýda, dep habarlady «WikiBilim» qoǵamdyq qorynyń jetekshisi Raýan Kenjehanuly Pm.kz saıtyna bergen suhbatynda.
«Premer-Mınıstr qazaq tilindegi kontentti damytý jobalaryna óz qoldaýyn bildirdi. Atap aıtqanda, «Qazaqsha Vıkıpedıa» jobasyn ári qaraı damytý týraly sóz bolyp otyr», - dedi Raýan Kenjehanuly.
Erkin kontentti damytý úshin yńǵaıly quqyqtyq ınfraqurylym qurýǵa múmkindik beretin Creative Commons (CC) lıtsenzııalaryn nasıhattaý týraly ıdeıa da Úkimet pen Premer-Mınıstrdiń qoldaýyna ıe bolyp otyr.
«CC lıtsenzııalarynyń negizinde biz Qazaqstannyń ashyq onlaın kitaphanasyn jasaı bastaımyz, sondaı-aq erkin bilim vıdeo-portalyn qurý jobasyn da qolǵa almaqpyz», - dedi R. Kenjehanuly.
«Qazaqsha Vıkıpedıa» aǵymdaǵy jyldyń maýsym aıynan bastap qolǵa alyndy. Qordyń jumysyna qazaqstandyq joǵary oqý oryndary, «Qazaqstan entsıklopedııasy» redaktsııasy, sondaı-aq Internettegi qazaq tili kontentin damytýǵa úles qosyp júrgen eriktiler kómektesýde.
«Vıkıpedıa entsıklopedııasynyń qazaq tildi taraýyndaǵy maqalalar sany 10 esege ósip, 100 myńnan asty. Qazaqsha maqalalar jazatyn jáne óńdeıtin erikti redaktorlar sany sáýir aıynda 4 adam ǵana bolsa, qazir 250 adamǵa jetti», -deıdi joba jetekshisi.
Osynyń arqasynda qazaq tili Vıkıpedıadaǵy tilder reıtıngisinde 125-orynnan 38-orynǵa deıin kóterilip, maqala sany 100 myńnan asatyn "jetik" dep tanylǵan 40 tildiń qataryna kirdi.
Bul jetistikter halyqaralyq vıkı-qaýymdastyq tarapynan joǵary baǵa aldy. Tamyzdyń 4-i men 7-si aralyǵynda Izraıldiń Haıfa qalasynda ótken «Wikimania-2011» konferentsııasynyń qorytyndysy boıynsha Qazaqstandyq «WikiBilim» qory «2011 jyldyń ǵalamdyq vıkıpedıashysy» ataǵyn ıelenip (Global Wikipedian of the Year), Vıkıpedıanyń negizin qalaýshy Djımmı Ýeılstiń (Jimmy Wales) arnaıy grantyn jeńip aldy.
Jobanyń negizgi maqsaty - ınternettegi qazaq tildi mazmundy arttyrý, qazaq tilindegi ıntellektýaldy ortany, vıkı qaýymdastyqty qalyptastyrý.
Internetten qazaq tilinde aqparat izdegen oqyrman izdegenin taba alýy qajet.
