Qazaqsha úırengisi kelmeıtin qazaqtardy óz-ózderine qarsy adamdar dep sanaımyn - Toqtar Áýbákirov
ALMATY. 11 aqpan. QazAqparat /Erbol Turymbetov/ - Búgin «Qazaq jýrnalısteri klýby» qazaqtyń tuńǵysh ǵaryshkeri, belgili qoǵam jáne memleket qaıratkeri, Halyq qaharmany Toqtar Áýbákirovpen kezdesý ótti.
T. Áýbákirov kezdesý barysynda jýrnalısterdiń suraqtaryna jaýap berip, memlekettik til - qazaq tili jaıynda da óz oıyn ortaǵa saldy. «Kezinde Reseıden elge kelgen soń qazaqsha bilmeıtinime qatty namystandym. Kúnde óz-ózimdi tárbıeledim. Qupııamdy aıtaıyn, men qazaq tilin óleń arqyly úırendim. Birde aqyn Oljas Súleımenovpen ýaǵdalasyp, endigi kezdeskende qazaq tilinde sóılesetin bolǵanbyz. Men ofıtser bolǵan soń sózimde turýǵa tyrysyp, úırenip aldym. Keıingi jastarǵa aıtarym, oryssha da, aǵylshyn tilin de úırensin, biraq eń birinshi qazaq tilin - óz ana tilińdi bil. Qazaqsha úırengisi kelmeıtin qazaqtardy óz-ózderine qarsy adamdar dep sanaımyn», - deıdi ǵaryshker.
Tuńǵysh qazaq ǵaryshkeri elimizdegi ǵarysh salasyn zerteý jaıyna kóńili tolmaıtynyn aıtty. «Qazaqtan shyqqan 2 ǵaryshkerden basqa taǵy 2 azamatymyz - Muhtar Aımahanov pen Aıdyn Áıimbetov ushýlary tıis bolatyn. Nege ekeni belgisiz, sharýa aıaqsyz qaldy. Aıdyn elge oralsa, Muhtar oqýyn jalǵastyrý úshin Reseı azamattyǵyn aldy. Ol jigitterge óz aqyl-keńesimdi aıtyp, qoldan kelgenshe kómektestim. Maǵan rahmetterin aıtyp, áli kúnge deıin habarlasyp turamyz», - deıdi T. Áýbákirov.
Sonymen qatar T. Áýbákirov aldaǵy saıası naýqan - Prezıdent saılaýyna qatysty óz pikirlerimen bólisti. «Búginde halyqtyń saýaty áldeqaıda ashylǵan. Men aýyldardy aralap júrgende osy jaǵdaıǵa kýá boldym. Aýyldarda gazet-jýrnaldardy jaqsy oqıdy. Eldegi jáne jan-jaqtaǵy bolyp jatqan oqıǵalardan bári habardar. Sondyqtan, qazaq halqy aldaǵy Prezıdent saılaýyna belsendi qatysyp, óz oı-pikirlerin bıýlleten arqyly ashyq bildire alady degen oıdamyn», - dedi Halyq qaharmany.
