Qazaqsha Ýıkıpedııada nege kásibı kontent az – Jas maman kózqarasy

ASTANA. KAZINFORM – 10-synyp oqýshysy qazaq tilindegi Ýıkıpedııa mazmunyn baıytýǵa úles qosyp júr. Jibek Joly arnasynyń «Búgin LIVE» baǵdarlamasy Rahman Tóregeldini qonaq etip, tildesip kórdi.

– Ýıkıpedııada mátinderdi óńdep, maqala jaza bastaǵanyma 3 jyl boldy. Negizi ıdeıa anamnan kelgen. Bir kúni anam maǵan: «Ýıkıpedııany qazaq tiline aýdarǵan adamdarmen tanyspyn, ol jerde kez kelgen adam jaza alady», – dep aıtty. Sol kezde qatty qyzyǵyp, bir maqalany jazyp kórdim. Alǵash osy isti 7-synyp oqyp júrgenimde, qazan aıynda bastaǵan edim. Birinshi maqalam Brazılııanyń saıasatyna qatysty boldy. Biraq ol materıal óshirip tastaldy. Sebebi óte sapasyz jazǵanmyn. Alǵashqy tájirıbemnen keıin Ýıkıpedııa ákimshiligi menimen baılanysyp, qatelerimdi túsindirdi jáne ary qaraı baǵyt-baǵdar berdi, – deıdi №66 mektep-lıtseıiniń oqýshysy.

Jas zertteýshi kóbine qaı taqyrypta maqala jarııalaıtynyn aıtty.

– Búginge deıin kóptegen taqyrypty qozǵadym. Ókinishke qaraı, naqty bir baǵytta, naqty bir salada maqala jazbaımyn. Ne nársege qyzyqsam, sol taqyrypta jaza beremin. Men bir aqparat izdep, qazaq Ýıkıpedııasyna kirsem, ol málimet joq bolyp qalady. Ózge adamdar mundaı jaǵdaıǵa kezikpesin dep, aqparatty qazaq tilinde júkteýge tyrysamyn, – deıdi Rahman.

Stýdııa qonaǵy Ýıkıpedııadaǵy qazaq tildi kontentterdiń basty máselesine toqtaldy.

– Sport, saıasat jáne mádenıet taqyryptarynda qazaqsha jazylǵan aqparattar tym az. Tarıh týraly jazbalar kóp bolǵanymen, ol tek Qazaqstan men bizge jaqyn elderdiń tarıhymen ǵana shektelip jatady. Al Eýropa, AQSh syndy shalǵaı elder týraly derek tabý qıyn jáne zamanaýı ánshiler, fýtbolshylar taqyryby da asa qamtylmaǵan. Ókinishke qaraı, bizdegi Ýıkıpedııanyń qaýymdastyǵy óte kishkentaı jáne óz salasynyń mamandary, ǵalymdary joq. Mysaly, orys Ýıkıpedııasynda ǵalymdar otyrady. Olar jıi kezdesip turady. Al bizde ázirge onshalyqty deńgeıde Ýıkıpedııa mádenıeti damyǵan joq, – deıdi ol.

10-synyp oqýshysy búginge deıin Ýıkıpedııadaǵy qazaqtildi aqparattardyń birtalaıyn óńdep úlgeripti.

– Búginge deıin Ýıkıpedııaǵa 50-den asa maqalam júkteldi. Biraq men kóbine qazaq tilinde jazylǵan málimetterdi tolyqtyryp, óńdeýmen aınalysamyn. 7500-den astam maqalany qaıta óńdedim. Kez kelgen aqparatymdy jarııalar aldynda mindetti túrde faktchekıng jasaımyn. Birneshe derekkóz taýyp, ondaǵy aqparattardyń sáıkestigin tekseremin. Senimdi bolmaǵan kezderimde ózge tildegi Ýıkıpedııa bólimderinen qarap kóremin. Ondaǵy derekkózderdi oqımyn, – deıdi oqýshy.

Rahman Tóregeldi birneshe tilde erkin sóıleıdi. Bul qabileti aqparat jınaýda kóp kómektesetinin jetkizdi.

– 3 tilde erkin sóıleı alamyn. Olar – qazaq, orys jáne aǵylshyn tilderi. Bul maǵan aqparattardy jınaýǵa múmkindik beredi. Kóptegen málimet qoljetimdi. 1 ne 2 tilmen ǵana shektelip qalmaısyń. Onyń ústine, álemde kóp aqparat aǵylshyn tilinde jarııalanady. Sondyqtan kóp til bilý sheksiz múmkindikterge jol ashady, – deıdi stýdııa qonaǵy.

Qazaq tiliniń janashyry Ýıkıpedııaǵa maqala daıyndaýǵa qansha ýaqyt jumsaıtynyn da aıtyp berdi.

– Ýıkıpedııaǵa qysqa maqala jazý úshin 2 saǵattaı ketedi. Al aýqymdy, kóp aqparat beretin maqalaǵa 5–6 saǵat jumsaımyn. Tipti, Qaırat Rysqulbekovke qatysty maqalamdy 2 apta jazdym. Sebebi derekkózder óte az boldy. Men aqparatty kóbine orys tilinde taba aldym jáne sol aqparatta kórsetilgen derekkózderdi de qaraýym kerek boldy, – deıdi ol.

Aıta keteıik, búgin Álemdik jáne dástúrli dinder kóshbasshylary VIII Ceziniń jalpy otyrysynda Memleket basshysy jastardy tolǵandyratyn túıtkilderdiń sheshimin birlesip izdeý qajet ekenin aıtqan edi.