«Qazaqsha sóıleıtin oqý orny kimmniń múddesine qyzmet etedi?» - respýblıkalyq basylymdarǵa sholý
***
«Egemen Qazaqstan» gazetiniń jazýynsha, ońtústik astanadaǵy birneshe iri kásiporyndarǵa qaraqshylyq shabýyl jasaǵan qylmystyq toptyń múshelerin quryqtaý Almaty qalalyq ishki ister departamentiniń bastyǵy Erlan Turǵumbaevtyń jetekshiligimen ótti. Arnaýly operatsııaǵa ІІM-niń «Suńqar» jáne «Arlan» toptary men jedel áreket etý otrıady qyzmetkerleri qatysty. Qaraqshylyq shabýylmen aınalysqan qylmystyq topty tutqyndaý is-sharasy bastalmas buryn bul úılerdiń 162 turǵyny qaýipsiz jerge ornalastyryldy. Sodan soń qylmyskerlerden óz erikterimen berilip, qarýlaryn tastaý talap etildi. Alaıda, bul usynysqa moıyn burmaı, qarsylyq kórsetken qaraqshylarǵa qarý qoldanylyp, alty qylmyskerdiń kózi joıyldy. Al jalǵa alynǵan bir bólmeli páterdi tintý barysynda eki «Kalashnıkov» avtomaty, bir ańshy myltyǵy, eki tapansha, bir revolver, oq dáriler tabyldy. Maqala «Qarýly qaraqshylardyń kózi joıyldy» degen taqyryppen berilgen.
***
Atyraýlyq elıtalyq mekteptiń birine quqyq qorǵaý organdary tarapynan tekserý júrgizilip jatyr. Basty sebep, mektepte el Prezıdentiniń bedeline nuqsan keltiretin kitaptar bar. Bul jaıynda «Aıqyn» gazetiniń búgingi sanyndaǵy «Qazaqsha sóıleıtin oqý orny kimmniń múddesine qyzmet etedi?» degen taqyryptaǵy maqalada baıandalǵan. «Ázirge bizge kitapqa baılanysty saraptamanyń nátıjesin kútý jáne quqyq qorǵaý organdary men salaǵa tıisti qurylymdardyń is-áreketterin baǵamdaý qalyp otyr. Bul mektepte qazir 130 oqýshy bar, jylyna 37600 dollardan tólegen kezde jylyna bes mıllıon dolarǵa jýyq tabystyń mektep salyǵyn tólep otyr ma eken?» dep jazady basylym.
***
«Ótken jylǵy dál osy kezeńmen salystyrǵanda Astanadaǵy jalpy bala týý kórsetkishi 8,7 paıyzǵa artypty. Bul týraly málimettti qalalyq densaýlyq saqtaý basqarmasynyń mamandary taratty», - dep jazada «Astana aqshamy» gazeti. Basylymnyń atap ótýinshe, shilde aıynda qalada jalpy sany 1855 bala dúnıe esigin ashqan. Onyń 926-sy ul, 929-y qyz bala. 21-i egiz. Aldyńǵy aımen salystyrǵanda kórsetkish 100-den astam balaǵa artyp otyr.
***
«Kazahstanskaıa pravda» gazetinde «Tsena na hleb ostanetsıa stabılnoı» degen taqyryppen jaryq kórgen maqalada Almaty qalasynyń ákimdigi Aýyl sharýashylyǵy mınıstrligi, «QazAgro» holdıngi, Un tartýshylar odaǵy arasynda qol qoıylǵan memorandým jaıynda baıandalǵan. Qalanyń kásipkerlik jáne ónerkásip basqarmasynyń bastyǵy Alfııa Balovanyń atap ótýinshe, memorandýmǵa sáıkes salmaǵy 650 gramdy quraıtyn áleýmettik nan baǵasy kóterilmeıdi ári bir bólkesi 60 teńge bolady. Al 1-surypty unnyń 1 kelisi 61 teńge turady. Sondyqtan da Qazaqstannyń astyq óńirlerindegi qurǵaqshylyqqa qaramastan astyq jetkizýde kedergiler bolmaıdy ári áleýmettik nan baǵasy kóterilmeıdi.
***
Al «Lıter» basylymynda«Dojdı zapozdalye» degen taqyryppen jaryq kórgen maqalada tamyz aıynda Qostanaı oblysynda nóserletip jaýǵan jaýyn óńirdegi astyqtyń shyǵymyna oń áser ete me degen saýalǵa jaýap izdeýge tyrysqan. «Qostanaı oblysyndaǵy qurǵaqshylyq saldaryn baǵalaýǵa kelgen Úkimettik delegatsııanyń saparynan týra 1 apta ótken soń óńirde jaýyn-shashyn kóbeıip ketti. Mamandardyń pikirleri ala-qula», - dep jazady basylym. Máselen, «Karken» JShS-niń dırektory Saıran Býkanov bul jaýyn-shashynyń endigi ýaqytta egin shyǵymyna túk paıdasy joq dep sanaıdy.
