Qazaqsha sóılep, án aıtatyn qýyrshaq shyǵady
ALMATY. Mamyrdyń 20-sy. QazAqparat /Názıra Eleýhan/ -Jaqyn arada tuńǵysh ret ulttyq kıimde, qazaq tilinde sóılep, án aıtatyn, bıleı alatyn álemdik qýyrshaqtardan sapasy kem bolmaıtyn qazaq qyzy men jigitiniń beınesindegi qýyrshaqtar shyǵady.
Qyzdyń esimi «Qaraqat», al ul bala «Balbala» dep atalady. Bul týraly QazAqparat agenttiginiń tilshisine bergen suhbatta «Ulytaý» tobynyń prodıýsseri Qydyráli Bolmanov málim etti, dep habarlaıdy QazAqparat.
Onyń aıtýynsha, qýyrshaqtar Qytaı elinde Gongkong qalasynda daıyndalýda. «Bul meniń qazir aınalysyp jatqan jobam. Jobanyń jalpy bıýdjeti mıllıon dollarǵa jýyq. Qazirgi ýaqytta jumystyń 70 paıyzy daıyn. Qýyrshaqtar birden Qazaqstannyń 6-7 qalasyna ákelinedi. Barlyq qalany qamtamasyz etýge tyrysamyz. Brend qalyptastyrý úshin úlken saýda dúkenderinde, álemdik qýyrshaq ındýstrııasy sııaqty, óziniń aty qoıylǵan arnaıy býtıkterde satylatyn bolady», dedi Qydyráli Bolmanov.
