Qazaqsha podkast pen blogter tildiń qoldanysyn keńeıtip jatyr — Nazgúl Qojabek
ASTANA. KAZINFORM — TikTok, YouTube, Instagram jelilerindegi qazaqsha kontent pen podkastardyń kóbeıýi qazaq tilin tutynýǵa múmkindik beretin ortany keńeıtip keledi. Bul týraly BIZDIÑ ORTA podkastynda til janashyry, redaktor ári medıa mamany, «Kalkasyz qazaq tili» Telegram arnasynyń avtory Nazgúl Qojabek aıtty.
Onyń sózinshe, qazaqsha kontent ázirge orys tilinde tutynylatyn kontenttiń ornyn tolyq basa almaǵanymen, bul baǵytta ilgerileý baıqalady.
— Kontent tutyný jaǵynan ilgerileý bar ekenine senemin. Orys tilinde tutynylatyn kontenttiń ornyn ázirge basa almasaq ta, qazaqsha kontent birtindep kóbeıip kele jatqany anyq. Qazir qazaqsha podkast kóp, ınflıýenserler men blogerler de kóbeıdi. Aǵy da, qarasy da bar, biraq olardyń qazaq tilindegi kontentti kóbeıtýge úles qosyp jatqany anyq. Kontenti qazaqsha, oǵan jazylatyn pikirler de qazaqsha. Kádimgideı qazaqsha qazan qaınap jatyr ınternette, — dep kúldi Nazgúl Qojabek.
Onyń pikirinshe, qazaqsha kontent kóbeıgen saıyn sapaly dúnıeler de birtindep iriktelip shyǵady.
— Onyń kóbigin alý, tazartý jaǵyn qoǵam ózi aqyryndap retteıdi dep oılaımyn. Qazir strımerlerdiń ersi áreketterine tyıym salynyp jatyr. Sol sııaqty bara-bara sapasyz, zııandy kontent shyǵaratyndar azaıyp, jaqsy kontenttiń úlesi artady. Bilim men ǵylym týraly kontent te kóbeıedi dep oılaımyn. Qazir, mysaly, saıahat týraly qazaqsha óte jaqsy kontent bar. Túrli elderden vıdeo, blog túsirip júrgender kóp. Kitap týraly da osyndaı blogtar bar shyǵar, múmkin men kórmeı júrgen shyǵarmyn, — dedi ol.
Aıta ketelik Nazgúl Qojabek qazaqsha ǵylymı jáne tanymdyq basylymdardy kóbeıtý qajet ekenin aıtqan edi.
