Qazaqsha «Kólikter - 3» otandyq prokatqa shyqty
ALMATY. QazAqparat - «MakKýınniń» shytyrman oqıǵalary qazaqsha jalǵasatyn boldy, dep habarlaıdy QazAqparat tilshisi.
Almatyda Almaty qalasynda «Esentai Mall» ortalyǵyndaǵy Kinopark 11-de «Tachkı 3»/«Kólikter 3» mýltfılminiń qazaq tilindegi aldyn ala jabyq kórsetilimi ótti.
Jańa mýltfılm 15 maýsymda elimizdiń kınoteatrlarynda prokatqa shyǵady.
Aıta ketý kerek, «Tachkı 3»/«Kólikter 3» anımatsııalyq blokbaster - qazaq tiline dýblıaj jasalǵan 20-shy kınokartına. Onyń aldynda 2011 jyly mýltfılmniń ekinshi bólimi dýblıajdalǵan bolatyn.
Álemge áıgili naızaǵaı MakKýın endi Djekson Daýylǵa aınaldy.
«Bul joba qazaqstandyqtarǵa álemdik Disney, Sony, Marvell , Lucas stýdııalarynyń sapaly ónimderin tamashalaýǵa múmkindik beredi. Fılmderdi biz «Meloman» jáne Disney kompanııalarymen birige otyryp tańdaımyz. Ýaqyt óte bul ózin-ózi aqtaıtyn jobalar. Qazaq tilindegi mýltfılmder - balalarǵa qazaq tilin úırenýdiń tıimdi quraly. Sondaı-aq, bizdiń jobamyz memlekettik tildi damytý týraly baǵdarlamanyń maqsatymen sáıkesedi», - dedi «Bolashaq» korporatıvti qorynyń dırektory Dınara Shaıjúnisova.
Qazaq tilindegi dýblıajynyń rejısseri Aıjan Jamshıtova boldy. Bas keıipkerlerdiń daýsyn Nyshanbek Jubanaev (Naızaǵaı MakKýın), Azamat Qanapııa (Metr), Saıa Toqmanǵalıeva (Krýz Ramırez), Syrym Qashqabaev (Djekson Shtorm), Nartaı Saýdanbekuly (Smokı Mo) jáne Marjan Arapbaeva men Nurken Óteýlov keltirdi.
2011 jyldan beri 20 kınokartına qazaq tiline aýdaryldy. Osy ýaqyt aralyǵynda 150 tehnıkalyq jáne shyǵarmashylyq maman, onyń ishinde 4 rejısser, 158 akter, 11 mýzykalyq jetekshi, aýdarmashylar Disney stýdııasynyń standartyna saı jumys istep úırendi.
Eń alǵashqy bolyp Ýıl Smıttiń «Qara kıimdiler-3» fılminiń juldyzdary, Djonnı Deptiń «Jalǵyz reındjeri», A.Djolıdiń «Malefısentasy» qazaqsha sóıledi.
Kóbine balalarǵa arnalǵan álemdik shedevrler «Kólikter», «Batyl júrek», «Moana», «Kúlbıke», «Monstrlar ýnıversıteti», «Alısa», «Djýnglı kitaby», «Malefısenta», «Órmekshi-adam» qazaqsha dýblıajdaldy.
Dınara Shaıjúnisovanyń aıtýynsha, jobanyń arqasynda Gollıvýd juldyzdary Djonnı Deptiń (Berik Aıtjanov), Andjelına Djolıdiń (Gúlnaz Áýesbaı), Ýıl Smıttiń (Azamat Qanapııa) daýystaryn dybystaýǵa 6 jylǵa eksklıýzıvti quqyǵy.
Sondaı-aq, Disney kompanııasynyń daýys bazasynda qazaqstandyq 100 akterdiń daýsy saqtaýly.
2017 jyldan beri Disney stýdııasynda dybystalyp kele jatqan qazaq tildi fılmderde Apple TV Itunes Movies resmı qosymshasynyń vıdeohostınginde jazylǵan qazaq tilinde dybystyq qosymsha qoıylǵan.
«Joǵary tehnologııalyq dýblıajdyń arqasynda ortasha quny 250 mln dollar bolatyn álemdik blokbasterler ulttyq ónimimizge aınaldy. Qazaq tili 2 túrik tili, Sony Picturestiń 7-tili, Walt Disneydiń 39-tiline aınaldy. Sondaı-aq, DVD, Blu-Ray formattarynda kórsetiletin Gollıvýd fılmderiniń 7-tiline aınaldy», - dedi D.Shaıjúnisova.
