Qazaqsha ǵylymı jáne tanymdyq basylymdardy kóbeıtý qajet — Nazgúl Qojabek
ASTANA. KAZINFORM — Sońǵy bir ǵasyrda qazaq qoǵamynyń bilim alý múmkindigi aıtarlyqtaı keńeıgenimen, qazaq tilinde bilim men ǵylym qalyptastyrý isinde úzilis boldy. Bul týraly BIZDIÑ ORTA podkastynda til janashyry, redaktor ári medıa mamany, «Kalkasyz qazaq tili» Telegram arnasynyń avtory Nazgúl Qojabek aıtty.
Onyń sózinshe, HH ǵasyr basynda Alash qaıratkerleri qazaq balasynyń ana tilinde saýat ashyp, bilim alýyna basymdyq berdi. Qazaqsha oqýlyq jazý, baspasózdi damytý da osy maqsattan týyndady. Alaıda keıingi saıası jaǵdaı men orystandyrý saıasaty bilim men ǵylymnyń baǵytyn ózgertti.
— Ol kisiler qazaq balasy qazaqsha saýat ashyp, qazaqsha bilim alsa, oǵan orys bilimi qosylsa dep oılaǵan. Keıin saıası jaǵdaılarǵa baılanysty biz oryssha bilim alyp kettik. Ǵylym da, saıasat ta oryssha júrdi, — dedi Nazgúl Qojabek.
Qazir jaǵdaı qaıta ózgerip keledi. Onyń aıtýynsha, qazaq tilinde bilim alýǵa múmkindik keńeıip, oǵan álemdik bilimdi qosýǵa jol ashyldy. Osy turǵydan alǵanda, qoǵam bir ǵasyrdyń ishinde úlken joldan ótti. Degenmen qazaq tiliniń bilim men ǵylym salasynda damýy aqsap qaldy.
— Bilim meńgerý jaǵynan basqa elderdiń talaı jyl júrip ótken jolyn aınaldyrǵan júz jyldyń ishinde ótip ketken ekenbiz ǵoı. Biraq sol aralyq kezeńde qazaq tiliniń damýy aqsap qaldy. Onyń ishinde qazaq tilinde bilim, ǵylym týdyrý isinde «áttegen-aı» deıtin kezeńder boldy. Endi sony qalpyna keltirýimiz kerek, — dedi ol.
Nazgúl Qojabek endigi mindetterdiń biri qazaq tilinde ǵylymı jáne tanymdyq kontentti kóbeıtý dep esepteıdi. Óıtkeni adam qaı tilde bilim alsa, keıin sol tilde bilim men ǵylym qalyptastyrýǵa beıim bolady.
— Oryssha oqyǵan bala oryssha bilim men ǵylym týdyrady ǵoı. Sol úshin qazaq tilindegi mektepterdi ashýǵa kóbirek kóńil bólip, qazaqsha ǵylymı basylymdardy, qazaqsha tanymdyq basylymdardy kóbeıtip, qazaqsha kitap shyǵarý isin jolǵa qoıý kerek. Endigi basymdyq osy bolýy tıis, — dedi medıa mamany.
