Qazaqsha dýblıaj jasalatyn fılmder qalaı iriktelip jatyr

ASTANA. KAZINFORM — Mádenıet jáne aqparat mınıstrliginiń Mádenıet komıteti elimizde fılmdi qazaq tilinde dýblıajdaý kórsetkishine qatysty túsinik berdi.

Qazaq tilin nasıhattaý jáne qazaq tilindegi kontent kólemin arttyrý maqsatynda 2022 jyldan bastap QR «Kınematografııa týraly» Zańyna sáıkes keń taralymǵa arnalǵan, halyqaralyq standarttar boıynsha kútiletin reıtıngi joǵary anımatsııalyq fılmder men otbasylyq baǵyttaǵy fılmderdi qazaq tiline dýblıajdaýǵa qarjylandyrý túrinde memlekettik qoldaý kózdelgen. 

Mádenıet jáne aqparat mınıstrligi janyndaǵy Ulttyq kınony qoldaý memlekettik ortalyǵy (Kıno ortalyǵy) Qazaqstan Respýblıkasynyń aýmaǵyna ákelinetin balalarǵa arnalǵan anımatsııalyq jáne otbasylyq fılmderdi qazaq tiline dýblıajdaýdy qarjylandyrý boıynsha biryńǵaı operator sanalady. 

— 2025 jyly Kıno ortalyǵy dýblıajdy qarjylandyrý maqsatynda eki márte ashyq konkýrs jarııalady. Konkýrstyq irikteýdiń basty talaby — fılmderdiń halyqaralyq standarttarǵa saı joǵary kórkemdik jáne tehnıkalyq sapasy. Konkýrstyń negizgi maqsaty: qazaq tildi kontentti damytý, mádenı ártúrlilikti qoldaý, jas urpaqtyń ana tiline qyzyǵýshylyǵyn arttyrý, otbasylyq qundylyqtardy nasıhattaý. Alaıda osy kúnge deıin konkýrs talaptaryna tolyq sáıkes keletin birde-bir joba usynylǵan joq. Saraptama keńesi usynylǵan fılmderdi qarap, olardyń mazmuny men kórkemdik deńgeıin talqylady. Talqylaý barysynda usynylǵan jobalardyń kópshiligi 2016-2023 jyldary shyǵarylǵan, qazirgi kezde álemdik kınoındýstrııada ózekti sanalmaıtyn fılmder ekendigi anyqtaldy. Bul óz kezeginde kórermen qyzyǵýshylyǵyn tómendetedi, — delingen Mádenıet komıtetiniń Kazinform agenttigine bergen jaýabynda.

Sonymen qatar, keıbir kompanııalar fılmderdi tek otandyq telearnalar men strımıngtik platformalarda kórsetýdi josparlap otyrǵandaryn habarlady.

Saraptama keńesi bul jobalardyń keń aýdıtorııaǵa, ásirese kınoteatrlar arqyly otbasymen kórýge arnalmaǵanyn jáne halyqaralyq standarttarǵa saı joǵary reıtıngpen keń taratýǵa áleýeti joq ekenin atap ótti.

— Qosa keterlik taǵy bir mańyzdy másele — kóptegen ótinim berýshilerde gollıvýdtyq meıdjor stýdııalar men eýropalyq stýdııalar talap etetin TPN (Trusted Partner Network) sertıfıkatynyń bolmaýy. Bul sertıfıkat — dýblıaj jumystary úshin mindetti shart. Osyǵan baılanysty Ortalyq dýblıaj jobalaryn qarjylandyrý boıynsha konkýrsty talapqa saı, sapaly jobalar usynylǵanǵa deıin júıeli túrde jalǵastyra beredi. Bul shara — Ortalyqtyń basym baǵyttarynyń biri, — dep atalyp ótken vedomstvo aqparatynda.

Atap aıtqanda, qazir memlekettik qoldaýdan basqa, jeke qarjy esebinen de sheteldik fılmder qazaq tiline dýblıajdanyp jatyr. Jyl basynan beri «Fınıst. Ǵajaıyp ertegi» («Fınıst. Pervyı bogatyr»), «Aqshaqar» («Belosnejka»), «Lılo men Stıch» («Lılo ı Stıch»), «Elıo» sheteldik fılmder kınoprokatqa shyqsa, dıstrıbıýtordyń aqparatyna sáıkes jyl sońyna deıin gollıvýdtyq blokbaster «Avatar. Ot pen kúl», «Ańdar shahary 2 (Zveropolıs 2)» qazaq tiline dýblıajdalyp kınoprokatqa shyǵýy josparlanǵan.

Eske salsaq, bıyl maýsym aıynda álemdik kınostýdııalardyń taǵy bir fılmi qazaq tilinde dýblıajdaldy.

Aıta keteıik, Qazaqstan kınematografısteri odaǵynyń basshysy Baýyrjan Nógerbekov 2005 jyly 12 qyrkúıekti «Qazaq kınosynyń kúni» dep ataýdy usyndy.