Qazaqsha dybys modeli halyqaralyq Hugging Face platformasynda jarııalanady
ASTANA. KAZINFORM – Elordada qazaq tilindegi mátindi dybysqa aınaldyrýǵa arnalǵan «TTS» (Text-to-Speech) jobasy tanystyryldy.
Jańa ónimniń tusaýy halyqaralyq «Qazaq tili» qoǵamynyń uıymdastyrýymen ótkizilgen «Qazaq tili – ǵylym men tehnologııa tili» taqyrybynda respýblıkalyq konferentsııada kesildi.
Konferentsııaǵa Úkimet músheleri, belgili ǵalymdar men sarapshy mamandar qatysty. Al óńirlerdegi til saıasatyna jaýapty mamandar men bilim basqarmalarynyń ókilderi onlaın formatta qosyldy.
Jıynda ǵylym, bilim, tehnologııa, til saıasaty jáne tsıfrlyq damý salalary talqylanyp, memlekettik tildiń zamanaýı ǵylymı-tsıfrlyq keńistiktegi orny men múmkindikteri qarastyryldy.
Halyqaralyq «Qazaq tili» qoǵamynyń prezıdenti Raýan Kenjehanuly qazaq tilindegi mátindi dybysqa aınaldyrýǵa arnalǵan «TTS» (Text-to-Speech) jobasyn tanystyrdy. Bul bastama qazaq tiliniń dybystyq qoryn jasandy ıntellekt ekojúıesine engizip, ony ǵylym men tehnologııa salasynda keńinen qoldanýǵa múmkindik beredi. Qazaqsha dybys modeli halyqaralyq Hugging Face platformasynda jarııalanady.
Konferentsııa aıasynda «Ulttyq dıktant» jobasy resmı túrde bastaldy. Dıktant oflaın jáne onlaın formatta ótkiziledi, oǵan kez kelgen azamat qatysa alady. Qatysýshylarǵa baǵa qoıylmaıdy, árkim óz saýattylyǵyn ózi tekseredi.
Onlaın dıktantty www.til.kz platformasyndaǵy «Ulttyq dıktant» paraqshasynda kez kelgen ýaqytta kez kelgen jerde jazýǵa bolady. Qatysýshylarǵa elektrondy alǵys hat pen KITAP platformasyna tegin jazylym beriledi.
Buǵan deıin 15 tilde sóıleıtin qazaq qyzymen suhbat jarııalaǵan edik.