«Qazaqsha bilesiń be? Dosyńa úıret!» - Astanada erekshe baıqaý bastaldy

Bul baıqaý Memlekettik tildi damytý Prezıdenttik qory men «Nur Otan» HDP «Jas Otan» Jastar Qanatynyń «Qazaqsha sóıleseıik!» aktsııasy aıasynda uıymdastyryp otyrǵan birlesken sharasy, dep habarlaıdy Memlekettik tildi damytý Prezıdenttik qorynyń baspasóz qyzmeti.

Osy sharanyń ashylýyna qatysqan Memlekettik tildi damytý Prezıdenttik qorynyń dırektory Azat Sháýeev, «Jas Otan» jastar qanaty tóraǵasynyń orynbasary Nurlan Sydyqov, «QAZTEST» Ulttyq testileý ortalyǵynyń Basqarma bastyǵy Aıdos Ábdiqalyqov, «Kartel» JShS-nyń qoǵammen baılanys jónindegi menedjeri Anar Jumaǵulova jáne Qazaqstan-Reseı ýnıversıteti dırektorynyń tárbıe isi jónindegi orynbasary Dınara Qonaqpaeva baıqaýdyń ótkizilý tártibin jáne barysyn tanystyrdy.

Baıqaýdyń basty maqsaty - stýdent jastardyń qazaq tilin úırenýine yqpal etý jáne olardy yntalandyrý.

Memlekettik tildi damytý Prezıdenttik qorynyń dırektory Azat Sháýeev: « ... baıqaý nátıjesi qazaq tilin úırený qıyn degen qoǵamdyq pikirdi joqqa shyǵarmaq» - dep atap kórsetti.

Baıqaý qyzyq ta, jeńil bolmaq. Baıqaýdyń ótý tártibimen tanysqan stýdentter arasynan dosyma qazaq tilin úıretemin jáne dosymnan úırenemin degen jastar juptary óz erikterimen sýyrylyp shyqty. Til úıretýshi, ıaǵnı qazaq tilin jetik meńgergen stýdent (oqytýshy) qazaq tilin bilýge yqylas tanytqan til úırenýshi (oqýshy), óz dosyn nemese kýrstasyn ortaǵa alyp shyqty.

Ári qaraı «QAZTEST» júıesi arqyly «oqýshylardyń» qazaq tilin meńgerý deńgeıi anyqtaldy. Olar til úırenýge berilgen eki aı ishinde aýyzeki qazaq tilin úırenip shyǵýy kerek.

Jeltoqsan aıynda uıymdastyrýshylar til úırenýshilerdiń qazaq tilin qandaı deńgeıde meńgergenin taǵy da «QAZTEST» júıesi jáne qazaq tilinde jeke suhbat ótkizý arqyly baǵalap, baıqaý jeńimpazdaryn anyqtaıdy.

Júldeli oryndardy ıelengen jastar Qordyń arnaıy dıplomymen jáne baıqaý demeýshisi «Beeline» saýda belgisi bar «Kartel» JShS-nyń baǵaly syılyqtarymen marapattalady. Sondaı-aq belgili bir deńgeıde til úırengen stýdentterge «QAZTEST» júıesiniń sertıfıkaty beriledi.

Uıymdastyrýshylardyń aıtýynsha, baıqaýǵa elordamyzdaǵy basqa da joǵarǵy oqý oryndarynyń stýdentteri qatysa alady. Ol úshin Astanadaǵy 74-29-92 telefonyna habarlasýlary kerek.

«Jobanyń tabysty bolaryna senimdimin, óıtkeni, til úırenýde árqashan alǵashqy qadam jasalýy kerek. Bul baıqaý jastardyń alǵashqy qadam jasaýyna bastama bolmaq. Elimizdiń qazaq tildi ózge de azamattary osy bastamamyzdy odan ári jalǵastyryp, óz dosyna, áriptesine, kórshisine aýyzeki qazaq tilin úıretýge kirisedi degen úmittemiz», - dedi A.Sháýeev.