Qazaqstanda jalpy ishki ónimniń ósimi 6%-ǵa jetti — UEM
ASTANA. KAZINFORM — Elimizdiń 2025 jylǵy qańtar-sáýirdegi áleýmettik–ekonomıkalyq damýynyń aldyn ala qorytyndylary jarııalandy, dep habarlaıdy Ulttyq ekonomıka mınıstrliginiń baspasóz qyzmeti.
Ulttyq statıstıka bıýrosynyń boljamdy derekterine sáıkes, bıylǵy tórt aıdyń qorytyndysy boıynsha JІÓ ósimi 6%-dy qurady. Ekonomıkanyń negizgi salalarynda: kólikte (22,4%), saýdada (7%) damý qarqynynyń artqany baıqalady. Ósim aýyl sharýashylyǵy (3,9%) jáne baılanys (2,6%) salalarynda da tirkeldi.
Kólik salasyndaǵy ósim salanyń jalpy kólemindegi úlesteri tıisinshe 20,5% jáne 19,6%-dy quraıtyn temir jol jáne qubyr kóligimen júkterdi tasymaldaý jónindegi qyzmetter kóleminiń ulǵaıýy esebinen qamtamasyz etildi. Joǵary dınamıka Túrkistan (21,8%), Jambyl (11,2%) jáne Abaı (14,9%) oblystarynda tirkeldi.
Qurylys salasynda naqty jumys kóleminiń ındeksi 16,2%-dy qurady. Sonymen qatar qurylys kezeńin eskere otyryp, jumystardy oryndaý qarqynyn arttyrý jáne jobalar qunynyń ósýine jol bermeý úshin jergilikti jerlerde qajetti úılestirýdi qamtamasyz etý tapsyryldy.
— Saýda salasy birinshi toqsandaǵy 6,3%-ǵa qaraǵanda 7% turaqty ósýdi kórsetti. Kóterme saýda kórsetkishi 7,4%-ǵa, bólshek saýda kórsetkishi 6,1%-ǵa deıin ósti. Birqatar óńir: Túrkistan oblysy — jemisterdi, kókónisterdi, farmatsevtıkalyq taýarlardy satatyn kásiporyndar esebinen 60,4%; Aqmola oblysy — astyqty, tuqymdardy jáne mal azyǵyn satatyn kásiporyndardyń arqasynda 44%; Shymkent — dızel otynyn, farmatsevtıkalyq taýarlardy, qara jáne tústi metaldardyń synyqtary men qaldyqtardy satatyn kásiporyndar esebinen 19,8%-ǵa joǵary ósimdi kórsetti, — delingen habarlamada.
Ónerkásipte óndiris ındeksi 6,4% jetti. Ósim taý-ken sektorynda — 7,1%, atap aıtqanda kómir óndirýdi ulǵaıtý esebinen (11,2%) baıqalyp otyr. Óńdeý ónerkásibinde kórsetkish 7,2% quraıdy, onyń ishinde tamaq ónimderin óńdeý (12%), temeki ónimderin (26,3%), hımııalyq ónimderdi óndirý (11,2%) jáne mashına jasaý (11,2%).
Aýyl sharýashylyǵy oń dınamıkany kórsetip keledi. Jalpy ónim ındeksi qańtar-sáýir aılarynda 3,9%-dy qurady.
Úkimet Prezıdenttiń elimizdiń ornyqty áleýmettik-ekonomıkalyq damýyn qamtamasyz etý jónindegi tapsyrmalarynyń sapaly iske asyrylýyn baqylaýda ustaıdy.
Buǵan deıin Úkimet basshysy Oljas Bektenov elimizde jalpy ishki ónimniń munaıdan tys salalar esebinen de ósip jatqanyn aıtty.