«QazAqparattyń» tóte jazý saıty bizdi atajurt jańalyqtarymen qaýyshtyrdy - Beıjiń Ulttar ýnıversıtetiniń stýdenti
ASTANA. Qarashanyń 20-sy. QazAqparat /Rızabek Núsipbek/ - Qazaq aqparat agenttiginiń Qytaı men Iran elindegi qazaq jurtyna arnap A. Baıtursynuly álipbıimen tóte jazý úlgisinde habar taratyp jatqanyna bir aıdyń júzi bolyp qaldy. Sodan beride shettegi qandastarymyz túrli forýmdarda osy ıgi jańalyqqa súıinishterin bildirip jatyr. Osyndaı hattardyń birin Qytaıdaǵy Qazaq jastary atynan Beıjiń Ulttar ýnıversıtetiniń stýdenti Imanmádı Qaıratuly «QazAqparatqa» joldapty.
«Qurmetti Qazaq aqparat agenttigi!
Ózderińizge eń aldymen Qytaı Halyq Respýblıkasynyń ishkeri Beıjiń, Shańhaı sekildi qalarynda oqyp jatqan qazaq stýdent jastary atynan úlken alǵysymyzdy bildiremiz! Biz sizderdiń tóte jazýmen ashqan saıttaryńyz arqyly ata jurtymyzdaǵy san alýan jańalyqtardy kórý múmkindigine ıe bolyp otyrmyz. Qazaq memleketiniń kúndelikti bolmysyn naqty, jyldam bilip otyrýymyzǵa óte qolaıly boldy. Bizdi qazaq memleketiniń ekonomıkalyq, qoǵamdyq, halyqaralyq qarym-qatynastary týraly jańalyqtary qyzyqtyrady», dep jazǵan qandasymyz óz hatynda ishki Qytaıdyń damyǵan qalalarynda bilim alyp jatqan qazaq jastarynyń kópshiligi oqýlaryn Qazaqstanda jalǵastyrǵylary keletinin aıtypty. Soǵan oraı, syrttaǵy qazaq jastarynyń Qazaqstanǵa baryp oqýyna qatysty tyń málimetter jazylyp tursa degen tilegin de jetkizipti.
Sondaı-aq Iran radıosynyń qazaq baǵdarlamalarynyń jetekshisi Japarbaı Shadkam myrza da elektrondyq poshtamen joldaǵan hatynda «QazAqparattyń» tóte jazý saıtyndaǵy aqparattardy ózderiniń habarlarynda keńinen paıdalana bastaǵandyqtaryn aıtypty.
Eske sala keteıik, «QazAqparat» tóte jazý úlgisindegi jańalyqtar saıtyn qazan aıynyń 20-synda ǵalamtorǵa qosqan bolatyn.
