QazAqparattyń 100 jyldyq mereıtoıyna oraı quttyqtaýlar kelip túsýde
«Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýty «QazAqparat» halyqaralyq aqparat agenttigin 100 jyldyq mereıtoıymen shyn júrekten quttyqtaıdy! «QazAqparat» ujymyna jetekshi BAQ-tyń joǵary mártebesin saqtap, odan ári órkendep, úlken shyǵarmashylyq tabystar men jetistikter tileımiz!», - dep jazdy QR Prezıdenti janyndaǵy Qazaqstan strategııalyq zertteýler ınstıtýtynyń ujymy.
«Egemen Qazaqstan» respýblıkalyq gazeti» AQ Basqarma tóraǵasy Darhan Qydyráli «QazAqparat» HAA ujymynyń zor eńbegin atap ótken.
«Jańalyqtyń jarshysy «QazAqparat» halyqaralyq aqparat agenttiginiń ujymyn búgingi mereıli kúnimen, júz jyldyq mereıtoıymen quttyqtaımyn! Shejireli tarıhy, qalyptasqan dástúri baı QazAqparat agenttigi búginde birneshe tilde jedel habar taratatyn, júz myńdaǵan turaqty oqyrmany bar, bedeli bıik, bási joǵary, abyroıy artyq aqparat quralyna aınaldy. Munda myqty medıa-menedjer Asqar Qumyran myrza basqarǵan áriptesterdiń eńbegi zor ekeni anyq. Bas basylymnyń bir jas úlkendigi bolmasa, Egemen Qazaqstan men «QazAqparat» agenttiginiń tarıhy da, taǵdyry da qatar órilgen. Sol áriptestik syılastyq jalǵasa beredi dep oılaımyz. Ǵasyrlyq toılaryńyz qutty bolsyn, qadirli áriptester! Jańa júzjyldyqqa basqan qadamdaryńyzǵa sáttilik tileımiz!», - dedi D. Qydyráli.
Al Jambyl oblysynyń ákimi Berdibek Saparbaev «QazAqparat» agenttiginiń ujymy el jylnamasyn jasaýǵa súbeli úles qosyp kele jatqanyn qadap aıtty.
«Sizderdi «QazAqparat» halyqaralyq aqparat agenttiginiń 100 jyldyq mereıtoıymen shyn júrekten quttyqtaımyn! «QazAqparat» — elimizdegi ózindik óreli tarıhy bar, baǵyt-baǵdary aıqyndalǵan, qalyń oqyrmany qalyptasqan bedeldi agenttiktiń biri.
Óziniń bir ǵasyrlyq tarıhynda qyzyǵy men qıyndyǵy mol úlken joldan ótken aqparat quraly ár jyldary álemdegi túrli jańalyqtardy, memleketimizdiń mereıli sátterin, el ishindegi erekshe jandar men eńbek adamdaryn barynsha nasıhattap, kópshilik oqyrmanǵa jetkizip keledi. Qaı kezeńde de ýaqyt talabyna saı elimizdiń oń ózgeristerin pash etip, qarapaıym halyqtyń máselesine mán berip, el jylnamasyn jasaýǵa súbeli úles qosýda. Qurmetti jýrnalıster qaýymy, ujym músheleri! Sizderdi osynaý mereıtoılaryńyzben quttyqtaı otyryp, denderińizge saýlyq, otbasylaryńyzǵa amandyq, baq-bereke tileımin!», - dep atap ótti B. Saparbaev.
«QazAqparat» ujymyna tilegin Qoldanbaly etnosaıası zertteýler ınstıtýtynyń dırektory Talǵat Qalıev te bildirdi.
Osy oraıda ol ótken júz jylda agenttikte kóptegen ataqty jýrnalıster qyzmet etkenin, QazTAG aqparattyq brend bolyp qalyptasqanyn, sondaı-aq jýrnalıstıkanyń ulttyq mektebine aınalǵanyn atap ótti.
«Búginde QazAqparat osy dástúrdiń jalǵastyrýshysy. Álemge qurmetti, senimdi ári jedel aqparat agenttigi retinde tanymal. Agenttiktiń kásibı komandasy birqatar taqyryptyq jáne arnaıy jobalardy júzege asyryp jatyr», - dep jazdy T. Qalıev.
Aqparat jáne qoǵamdyq damý vıtse-mınıstri Kemelbek Oıshybaev ta QazAqparat ujymyn ataýly merekemen quttyqtady.
Sonymen qatar áleýmettik jelidegi paraqshasynda QR Prezıdenti janyndaǵy «Ortalyq kommýnıkatsııalar qyzmeti» respýblıkalyq memlekettik mekemesiniń dırektory Rýslan Álishev arnaıy quttyqtaýyn joldady.
«Dostar! Búgingi kún tamasha jańalyqpen bastaldy – elimizdiń iri jáne bas aqparattyq agenttigi «QazAqparatqa« 100 jyl toldy! «QazAqparat» degende oıǵa ne keledi? Árıne, eń ózekti jáne tekserilgen jańalyqtar, analıtıka, el ımıdji! Sonymen qatar, kóptegen adamdar úshin, ásirese jýrnalısterge, «QazAqparat» jaqyn seriktes jáne ómirlik tálimger boldy! Qazaqstannyń Ortalyq kommýnıkatsııalar qyzmeti úshin de «QazAqparat» kompanııasy úlken ári senimdi dos bolyp tabylady. Óıtkeni, bizdiń mindetterimiz ben mıssııalarymyz bir – eldiń damýyna atsalysý jáne myqty qoǵamdy qalyptastyrý. Mereıtoılaryńyz qutty bolsyn, áriptester!», - dep jazdy R. Álishev.
Óz quttyqtaýyn «Qazalliance» sheteldegi qazaqstandyqtar alıansy da joldady.
«Qurmetti «QazAqparat« halyqaralyq aqparat agenttigi! Sizderdi búgingi 100 jyldyq mereıtoılaryńyzben shyn júrekten quttyqtaı otyryp, aldaǵy ýaqyttaǵy árbir ıgi isterińiz ben kreatıvti jobalaryńyzǵa sáttilik, ujym músheleri men olardyń otbasylaryna amandyq-saýlyq, baq-bereke tileımiz. «World Dombyra Festival« jobasy aıasynda kórsetken erekshe qoldaýlaryńyz joǵary baǵalaı otyryp, tabysty yntymaqtastyǵymyz budan ári jalǵasa beretinine kámil senemiz», - delingen quttyqtaýda.
