«QazAqparat» Ulttyq kompanııasy «Otandyq óndirýshi» respýblıkalyq konkýrsynyń jeńimpazy atandy
ALMATY. 16 jeltoqsan. QazAqparat /Aıgúl Turysbekova/ - Almatyda buqaralyq aqparat quraldarynyń arasynda ótken «Otandyq óndirýshi» respýblıkalyq konkýrsynyń jeńimpazdaryn marapattaý rásimi ótti.
«QazAqparat» Ulttyq kompanııasy «Sapa men jedeldik» atalymynda úzdik dep tanylyp, bizdiń agenttikke qurmet dıplomy tabys etildi.
Konkýrstyń maqsaty otandyq óndiristiń, aýyl sharýashylyǵy salasynyń tarıhyna, onyń qazirgi jaǵdaıy men damý perspektıvasyna, naryqtyń damý úrdisi men osy taqyrypty Qazaqstan halqynyń arasynda keńinen tanystyrýǵa jurtshylyqtyń nazaryn aýdarý bolyp tabylady.
Konkýrsqa respýblıkalyq jáne óńirlik telearnalardyń, baspasóz jáne elektrondyq buqaralyq aqparat quraldarynyń jýrnalısteri qatysty. Agrarlyq sektordyń, otandyq óndiristiń damýy, jańa tehnologııalardyń engizilýi, salamatty halyqty qalyptastyrýdaǵy bıznestiń roli, azyq-túlik qaýipsizdigi taqyryptaryna arnalǵan 300-deı materıal sarapqa salyndy.
Konkýrs jeńimpazdarynyń qatarynda - «Kazahstanskaıa pravda», «Bıznes ı vlast», «Panorama», «Ekspress-K» gazetteri, «Habar», «Mır», «Qazaqstan», teleradıokompanııalary, birqatar aımaqtyq buqaralyq aqparat quraldary bar.
